Durante Kopa Mundial di FIFA 2026
WILLEMSTAD – 3 di yüli 2026 –Dia 24 di yüni, un dia promé kuKòrsou su di 3 partido den Kopa Mundial di FIFA 2026,Ofisina di Turismo di Kòrsou (CTB) a organisá e evento ‘Blue Wave Takeover’ na Philadelphia, un merkado nobo ku ta situá serka di Kòrsou su merkadonan di enfoke prinsipal na Merka kual ta New York i Newark. E evento a reuní representantenan di medionan di komunikashon tradishonal i kreadónan di kontenido na Philadelphia. Adishonalmente, direktor di CTB, sr. Muryad de Bruin a partisipá den vários entrevista na televishon na Philadelphia.
E ‘Blue Wave Takeover’ a keda organisá den kolaborashon ku Diamond PR i a tuma lugá na Ballers kual ta un klup sosial di deporte ku ta inkluí un kancha di futbòl paden kaminda e representantenan di media a haña e oportunidat pa disfrutá di kuminda lokal, bebida, entretenementu i gana premionan fantástiko, manera ticket di entrada pa Kòrsou su wega dia 25 di yüni último i un biahe pa Kòrsou pa dos persona.
Den oranan di mainta dia 24 di yüni, sr. de Bruin a duna entrevista den diferente programa di mainta na kanalnan di televishon na Philadelphia. E kobertura a sali djis promé ku e wega di Kòrsou kontra Costa de Marfil na FOX29 Philadelphia, CW17 Philadelphia i 6ABC Philadelphia, kontribuyendo na e entusiasmo rondó di Kòrsou su promé partisipashon na Kopa Mundial. Total e segmentonan a yega na un oudiensia impreshonante di riba 3 mion hende.
E segmentonan a resaltá no solamente e historia ekstraordinario di e klasifikashon di Blue Wave pa e mundial di e aña aki, pero tambe a pone enfoke riba e orguyo i e kultura di Kòrsou ku a keda kompartí na e siudatnan anfitrion. Durante e entrevistanan ku sr. de Bruin, a elaborá riba kiko e partisipashon históriko aki ta nifiká pa e komunidat di Kòrsou i e impakto ku esaki lo trese pa futuro di deporte i tambe turismo na Kòrsou. Ademas FOX29 Philadelphia a kompartí e segmento riba nan página di Instagram den kolaborashon ku Fox5NY i FWC26Philly, alkansando un oudiensia adishonal riba medionan sosial di mas di 709 mil persona.
