WILLEMSTAD – 13 di mei 2026 –Ofisina di Turismo di Kòrsou (CTB) ta raportá ku sifranan di turismo di estadia na luna di aprel ta sigui mustra un prestashon positivo, reflehando kresementu kontinuo for di e merkadonan prinsipal. Durante aprel, un total di 75.332 turista di estadia a keda risibí, representando un kresementu di 10% kompará ku aprel aña pasá.
E datonan di e profil di bishitante ta indiká ku mayoria turista di estadia a bini pa vakashon (90%), miéntras un kantidat mas chikí a bini pa bishitá famia i konosínan (3%) i pa propósitonan di negoshi (3%). Turistanan a keda Kòrsou un averahe di 7.9 anochi, reflehando tempu signifikante pasá riba Kòrsou. E estadianan largu aki ta sigui sostené partisipashon amplio den ekonomia lokal, ku benefisio pa akomodashonnan, restorantnan, servisionan di transporte i operadornan di tour.
Prestashon tòp 3 merkadonan na luna di aprel2026
Hulanda: Un total di 24.620 turista a keda risibí for di Hulanda na luna di aprel, reflehando Kòrsou su merkado prinsipal ku un prestashon ekselente di 11% kompará ku aña pasá. Mayoria turista hulandes (55%) a opta pa un otro opshon di akomodashon ku no ta resort, miéntras 45% a skohe pa un resort hotel. Turistanan hulandes ta representá 33% di tur turista di estadia ku a bishitá nos pais durante aprel. E turistanan aki a keda un promedio di 11.4 anochi durante nan bishita.
Estádos Unídos: Estádos Unídos a keda un kontribuidó fuerte pa turismo di Kòrsou registrando 20.491 turista di estadia kual ta 14% kresementu kompará ku e mesun luna na aña pasá. Turistanan merikano ta representá 27% di tur turista di estadia ku a bishitá Kòrsou durante aprel. Den término di akomodashon, 68% di turistanan merikano a skohe pa resort hotels miéntras e sobrá 32% a opta pa otro opshon di akomodashon. Turistanan prosedente di Estádos Unídos a keda un promedio di 5.5 anochi na Kòrsou.
Canada: Kòrsou a risibí 4.754 turista for di Canada, reflehando un kresementu di 22% kompará ku e mesun periodo na aña pasá. Kanadesnan ta representá 6% di tur turista di estadia ku a bishitá Kòrsou durante aprel. Turistanan prosedente di Canada a keda un promedio di 7.3 anochi na Kòrsou, kaminda 49% a skohe pa hospedá na resort hotels. E merkado kanades a sigui demostrá kresementu stabil i interes fuerte pa Kòrsou.
Monitoreo kontinuo
Luna di aprel ta marka final di e temporada haltu di turismo. Kòrsou su popularidat a keda konstante durante lunanan di wenter, prinsipal for di merkadonan di enfoke. Logra mehorashonnan turístiko balansá ta keda esensial pa Kòrsou; sigurando kresementu ku ta fortalesé oportunidatnan ekonómiko miéntras ta preservá e loke ta hasi Kòrsou úniko i estilo di bida vibrante ku tantu bishitantenan komo komunidat ta balorá. E demanda kontinuo for di merkadonan prinsipal ta reforsá e importansia di esfuersonan stratégiko pa mantené tantu satisfakshon di bishitantenan komo bienestar di komunidat.
