….kasi 51 mil turista di estadia
WILLEMSTAD- 8 di ougùstùs 2023 – Yüli 2023 tabata un luna ekstraordinario pa industria di turismo di Kòrsou ku un prestashon remarkabel di 50.936 turista di estadia, kual ta un kresementu di 6% kompará ku e mesun periodo na aña pasá. E prestashon aki ta hasi yüli 2023 e luna ku e mihó prestashon di e aña aki te ku awor, poniendo nos isla riba e direkshon pa alkansá e milestone históriko di mei mion turista di estadia na final di aña. Notablemente, esaki ta marka tambe e promé biaha ku e kantidat di turista di estadia risibí durante e promé 7 lunanan di aña a surpasá 300 mil turista di estadia. Te na e momentunan aki, Kòrsou a risibí 323.808 turista di estadia, demostrando un kresementu impreshonante di 17% kompará ku e 275.799 turista di estadia risibí durante e mesun periodo na aña pasá.
E imágen abou ta mustra e prestashon mensual di 2023 kompará ku e meta mensual i e kantidat di turista risibí na aña pasá.
Kantidat di turista di estadia na yüli 2023
CTB ta mira un prestashon eksepshonal di diferente merkado prinsipal na luna di yüli, kual huntu a kompensá e kaida antisipá di merkado hulandes. Aña pasá nos a registrá 23.489 turista hulandes na yüli, miéntras e aña aki nos a risibí un total di 19.378 turista hulandes, un bahada di 18%. E prestashon di region Europeo a baha ku 17%. Sinembargo, e kantidat di bishitante for di region di Nort Amérika a oumento ku 33%. Total 14.106 turista a keda risibí for di Nort Amérika di kua 12.457 ta residente di Merka.
Tambe tin un kresementu supstansial den kantidat di bishitante for di Sur Amérika. CTB ta raporta un kresementu di 51% den kantidat di bishitante. Den kantidat apsoluto, nos a risibí 9.203 turista for di Sur Amérika na yüli. E region di Karibe tambe ta mustra kresementu, registrando 23% mas turista kompará ku aña pasá, 4.020 turista tabata prosedente di e islanan bisiña.
E imágen abou ta mustra e prestashon di kada region kompará ku aña pasá, inkluyendo e kantidat ku kada region ta representá den e total di turista di estadia ku a bishitá nos pais.
E paisnan den tòp 5
Huntu e paisnan den tòp 5 na luna di yüli 2023 a representá un total di 77% den kantidat di turista di estadia. Aunke a registrá ménos turista hulandes, Hulanda ta keda e merkado ku e mihó prestashon registrando 19.378 turista na luna di yüli. Apesar di registrá ménos turista hulandes kompará ku yüli 2022, CTB ta raportá ku e kantidat di bishitante for di Hulanda ta mas haltu kompará ku yüli 2019 na momentu ku 16.456 turista hulandes a keda registrá. Merka, Canada, Brazil i Colombia a registrá kresementu fuerte na yüli. E kresementu den kantidat di bishitante ta atribuí na e kresementu stratégiko den kapasidat di stul for di e destinashonnan internashonal klave huntu ku nos partnernan di e diferente aerolíneanan. Jetblue ku awor ta ofresé 5 buelo pa siman for di New York i Air Canada ofresiendo 3 buelo pa siman saliendo for di Toronto durante e lunanan di zomer. Aña pasá durante e mesun periodo, Jetblue i Air Canada tabata ofresé respektivamente 3 i 1 buelo pa siman. Ademas, e biahe inougural altamente antisipá di Azul Airlines for di Belo Horizonte a habri oportunidatnan nobo i a reforsá e konekshonnan ku Brazil. Esaki ta promé biaha ku Brazil a bula e kantidat di 2000 turista den un solo luna. CTB a registrá 2.956 brasilero na yüli.
E imágen abou ta ilustrá e prestashon di e 5 merkadonan tòp inkluyendo e tòp 3 estadonan for di kua nos turistanan ta prosedente.
Tipo di akomodashon, promedio di anochi i demografia
Informashon kompilá for di e karchinan di imigrashon ta mustra ku total turistanan a pasa un promedio di 9.5 anochi na Kòrsou. Di tur e turistanan, 61% a keda den un resort hotel. Hopi di e turistanan ku a biaha pa Kòrsou na yüli ta entre 25 – 44 aña (32%) miéntras 30% ta entre 45 – 64 aña. E imágennan abou ta ilustrá e akomodashon i demografia di e turistanan ku a biaha pa Kòrsou na yüli 2023.
