WILLEMSTAD – 19 di novèmber 2026 –Ofisina di Turismo di Kòrsou (CTB) ta invitá tur organisashon di bario rònt Kòrsou pa partisipá na “Dushi Bario”, un inisiativa nobo ku ta resaltá barionan lokal i ta konektá nan ku turismo. E proyekto ta keda ehekutá den estrecho kolaborashon ku Ministerio di Desaroyo Sosial, Labor i Bienestar i Ministerio di Desaroyo Ekonómiko. Boso bario tin historia, naturalesa, kultura i ambiente? Esakinan ta e karakterístikanan prinsipal di un Dushi Bario.
E inisiativa Dushi Bario tin komo meta pa duna bèk na un bario dor di trese dilanti e potensial ku e bario tin. E Dushi Bario lo ta un bario ehemplar, skohé pa un komishon imparsial. E inisiativa lo yuda desaroyá e kapasidat i abilidatnan di e bario i su habitantenan, pa asina huntu nan por forma un bario sostenibel.
Dikon boso bario mester partisipá?
- Oportunidat pa deskubrí e potensial di boso bario
- Fasilidatnan ku ta drecha e imágen di e bario i alabes ta sirbi e habitantenan, manera aria pa planta, espasio pa rekreá i sistema di resiklahe públiko.
- Kapasitashon: programanan di entrenamentu diseñá spesífikamente pa habitantenan di e bario, por ehèmpel pa bira guia di bario òf embahador kultural, òf djis pa amplia nan konosementu.
- Stimulá habitantenan ku ya tin talento pa traha artesania, kosnan di boka dushi, kuminda i mas, pa desaroyá esaki mas ainda i asina generá entrada èkstra.
- Oportunidat pa bira un ehèmpel positivo pa otro barionan di Kòrsou
- Oportunidat pa deskubrí talento nobo den boso bario
- Oportunidat pa desaroyá eksperensianan outéntiko den boso bario pa habitantenan i bishitantenan
Organisashonnan di bario por yena e formulario di aplikashon na dos manera:
- Online: bishitá www.curacaotouristboard.com/dushibario pa e formulario i mas informashon detayá tokante e inisiativa Dushi Bario. E link di aplikashon ta disponibel tambe riba e páginanan korporativo di medio sosial di CTB [Curacao Tourist Board].
- Via kódigo QR: skèn e kódigo QR ku ta aparesé den e anunsionan di CTB den korantnan lokal.
Último fecha pa kompletá e formulario ta 30 di novèmber 2026.
E bario skohé lo keda anunsiá despues ku tur aplikashon keda evaluá.




