WILLEMSTAD- 13 desèmber, 2022 – Den kuadro di e resien KLM Curaçao Marathon, un total di 20 agente di biahe hulandes a bini Kòrsou pa partisipá na e máratòn i alabes kombiná esaki ku un bishita edukashonal. Durante nan estadia di 5 dia, e agentenan di biahe a haña oportunidat pa inspekshoná vários hotèl i resort i ademas nan a haña chèns di konosé nos sentro di siudat, aria di Bándabou, i tambe disfrutá di nos playanan.
E aña akí a skohe pa banda di laga e agentenan di biahe eksperensiá i sera konosí ku nos kultura i historia pa konsentrá tambe riba 2 tópiko esta merkado di luho i sostenibilidat. A skohe pa e merkado di luho mirando ku diferente di e agensianan di biahe ku a forma parti di e bishita ta bende paketenan spesial pa e segmento di biahero akí. Pa loke ta trata e tema di sostenibilidat, esaki ta algu ku spesialmente último tempu ta hopi importante i ta hañando mas i mas atenshon di biaheronan. Den kuadro di e tema akí a skohe pa entre otro laga e agentenan di biahe kana enbes di usa transporte ora e distansia entre e aktividatnan ku nan mester a bishitá tabata kòrtiku, hasi rekorido den nos sentro di siudat Willemstad riba skuter eléktriko enbes di den bùs i kome na restorant ku ta brinda kuminda saludabel ku ta produsí lokalmente. Tambe e agentenan por a mira e diferente maneranan kon nos barionan, hotèlnan, negoshinan i organisashonnan ta praktikando sostenibilidat den nan seno. Por ehèmpel dor di usa pènelnan solar, muha mata ku awa ku ya a usa, duna turistanan rekuerdonan trahá di material resiklá, i usa bèrdura fresku ku ta plantá den ‘moestuin’ di un hotèl mes.
Ofisina di Turismo di Kòrsou (CTB) ta sumamente agradesido di por a organisá e bishita edukashonal akí pa e 20 agentenan di biahe huntu ku KLM. E agensianan di biahe ku a forma parti di e bishita akí ta The Travel Club, Exit Reizen, Reisburo Bilthoven, Travel XL de Kleermaeker, VCK Travel, TUI, Silverjet, Holiday Planners, Reisburo Schoenmaeckers, Reisbureau Schiebroek, D-Reizen i Mijn Reiskennis. E revista di industria di biahe, Travelpro tambe a forma parti di e bishita edukashonal.
