Home / Press Releases / AFC Ajax na Kòrsou

den luna di mei 2022
WILLEMSTAD- 6 di aprel 2022 – Den luna di mei próksimo Ofisina di Turismo di Kòrsou (CTB) ta risibí e selekshon di Ajax 1 na Kòrsou. Esaki komo parti di e kombenio ku CTB tin ku Ajax komo partner ofisial ya pa 2 aña. Ajax lo hunga un wega di fogeo kontra di e ekipo nashonal di Kòrsou i lo bishitá diferente proyekto na Kòrsou.

Durante di nan estadia na Kòrsou, e tim di Ajax lo partisipá na diferente proyekto manera klínika di futbòl pa hóben i seminarionan pa coachnan i staf. Tambe Ajax lo bishitá skolnan i otro instansianan manera e Johan Cruijff Court i e fasilidatnan di Jong Holland.

Ekipo nashonal di Kòrsou – Ajax
Na final di nan bishita lo tin un wega di fogeo entre e ekipo nashonal di Kòrsou i Ajax 1. Di e manera aki nos héroenan nashonal por prepará nan mes pa e siguiente buèlta di Nations Cup ku lo tuma lugá na yüni 2022. Esaki sigur ta un bunita challenge mirando ku nos ekipo nashonal lo tin un kontrinkante di nivel internashonal ku un historia impreshonante. E wega di fogeo ta keda organisá den estrecho koperashon ku Federashon Futbòl Kòrsou (FFK).

Logronan
Ajax ta un ekipo ku no mester di masha introdukshon na Kòrsou. Un ekipo ku hopi rèkert i e kampion aktual den e Nederlandse Eredivisie. Na e momentunan aki Ajax ta den kontienda pa e título 2021 – 2022 i dia 17 di aprel próksimo Ajax lo ta kontra PSV den e KNVB-bekerfinale. Ajax a gana kuater biaha Champions League, na aña 2017 nan a yega final di Europe League i na 2019 nan a yega na e semi final di Champions League. Ademas Ajax ta konosí pa krea talentonan; e akademia ‘De Toekomst’ ta un di e skolnan di futbòl pa hóben mas prestigioso na mundu.  

AFC Ajax op Curaçao
AFC Ajax on Curaçao