WILLEMSTAD- 11 di yüli 2021 – Ofisina di Turismo di Kòrsou (CTB) ta raportá un kantidat di 21.223 turista di estadia pa luna di yüni. Ku e kantidat di turista di estadia aki, luna di yüni a bira e luna ku mihó prestashon for di momentu ku Kòrsou a habri bèk pa tráfiko aéreo komersial na yüli 2020. Na medio mei, Gobièrnu Hulandes a anunsiá konseho di biahe positivo pa Kòrsou i e kódigo pa Kòrsou a kambia di oraño pa hel. Na fin di mei, Alemania tambe a eliminá e konseho di biahe negativo pa Kòrsou i Estádos Unídos a ahustá e nivel di rísiko di biahe pa Kòrsou di nivel 4 pa nivel 2. Na mes momentu, Kòrsou a kuminsá suavisá e medidanan lokal kual a keda imponé durante e di dos ola di Covid-19.
E konsehonan di biahe positivo den nos merkadonan prinsipal kombiná ku suavisashon di e medidananlokalrelashoná ku Covid-19a resultá den subida di e kantidat di turista na luna di yüni. E tendensia positivo aki na luna di yüni ta kontinuando na yüli i ta hasi sobrá di aña mustra prometedor pa loke ta trata kantidat di turista.
Pa luna di yüni un kantidat di 12.148 turista hulandes i 485 turista aleman a keda risibí. Total un kantidat di 13.541 turista prosedente for di Europa a keda risibí na luna di yüni. Na yüni, 55% di e turistanan prosedente for di Europa a keda den un ‘resort hotel’ (esta hotèl chikí, grandi i bùngalo). For di Estádos Unídos un kantidat di 4.763 turista a bishitá Kòrsou na luna di yüni. E kantidat di turista for di Estádos Unídos ta moviendo den bon direkshon mirando ku awor turistanan for di tur 50 estado por bishitá Kòrsou.
For di region di Sur Amérika un total di 1.381 turista di estadia a bishitá Kòrsou, 46% ta prosedente for di Colombia miéntras 15% ta prosedente di Brazil. For di Karibe un total di 1.003 turista di estadia a keda risibí na yüni. Mayoria di e turistanan aki ta prosedente di e paisnan den Reino Hulandes. “Ku riba 21 mil turista di estadia na yüni i yegada di e promé barkunan krusero desde mart 2020, por bisa ku rekuperashon den kantidat di turista realmente a start. Ku un grado di bakunashon haltu lokalmente i e kantidat abou di kasonan positivo, Kòrsou ta keda un destinashon atraktivo pa bishitantenan. Pa e motibu aki nos ta mira padilanti riba kontinuashon di e tendensia positivo aki den kantidat di turista”, asina CEO di CTB, Paul Pennicook a remarká.
