Home / Press Releases / Mas di 9000 turista di estadia na luna di ougùstùs

Sifranan preliminar ougùstùs 2020

WILLEMSTAD- 7 di sèptèmber 2020 –  Ofisina di Turismo di Kòrsou (CTB) ta raportá 9.227 turista di estadia pa luna di ougùstùs. 89% di e kantidat di turista registrá ta prosedente di Europa i 5% a bini for di region Karibe.

Konsiderando ku te na e momentunan aki solamente turistanan for di algun pais den Wèst Europa por bishitá Kòrsou, por mira ku 91% di e europeonan ku a bishitá nos ta prosedente di Hulanda. Nos a risibí 7.518 turista for di Hulanda kual ta 53% ménos kompará ku ougùstùs 2019. For di Alemania un kantidat di 291 turista aleman a keda registrá, un bahada di 75% kompará ku aña pasá. Na luna di ougùstùs, 55% di turistanan for di Europa a keda den hotèl, miéntras 45% a keda den un akomodashon alternativo. Na momentu ku a kuminsá risibí turistanan bèk na luna di yüli, e distribushon entre hotèl i akomodashonnan alternativo tabata respektivamente 45% i 55%. Un otro indikadó interesante ta e kantidat averahe di anochi ku e europeo a keda nos pais. Na ougùstùs 2020 e averahe di anochi tabata 11.7 miéntras aña pasá e mesun luna a registrá un averahe di 9.9 anochi pa kada turista prosedente di Europa. Esaki ta 18% kresementu den e kantidat averahe di anochi ku turistanan for di Europa a keda riba nos pais.

For di region Karibe, Kòrsou a risibí 483 turista di estadia. 82% ta turistanan prosedente di Bonaire.

“Konsiderando ku nos ta habrí pa solamente un kantidat limitá di pais den Europa, tabata bon pa tuma nota ku mas di 9000 turista di estadia a hasi nan yegada na ougùstùs. Luna di ougùstùs a registrá tambe un kresementu den e kantidat di turistanan ku a keda den hotèl”, asina sr. Paul Pennicook CEO di CTB a remarká.

Download e sifranan.

Site Visit Quick Win Plan Zakito
Over 9,000 stayover visitors in August