Home / Press Releases / Bishita di Trabou na área di Zakito

WILLEMSTAD- 7 di sèptèmber 2020 – Resientemente Ofisina di Turismo di Kòrsou (CTB) enkargá ku ehekushon di e “Quick Win Plan” pa desaroyo di e área di Zakito, a organisá na Koredor un enkuentro pa duna informashon di e progreso di e trabounan na e Ministernan konserní. E “Quick Win Plan”, kual ta finansiá pa Ministerio di Desaroyo Ekonómiko, ta konsistí di diferente elemento ku lo mester keda realisá den e lunanan benidero. E Plan akí ta un siguiente paso den implementashon di e Vishon ku Gobièrnu di Kòrsou a aprobá pa e área di Zakitó. E enkuentro a konta ku presensia di Minister enkargá ku Desaroyo Ekonómiko Dr. Steven Martina, Minister di Tráfiko, Transporte i Planifikashon Urbano sra. Zita Jesus-Leito i representantenan di e ministerionan enbolbí. Durante di e rekorido presentenan a haña splikashon di e representante di CTB i di Heren2 Caribbean B.V. ku ta e kompania enkargá ku supervishon di e proyekto.

A skohe Jaydicon B.V. komo e kontratista enkargá ku ehekushon di e trabounan di remodelashon di e edifisio di siguridat i parti di loke ta konosí komo Sundance Building na Koredor. Unabes e trabounan di remodelashon ta kla, e edifisionan akí lo ta disponibel pa servisio di F&B. Mirten General Construction Company B.V. a keda enkargá ku remodelashon di sinku sitio na diferente punto riba Koredor, inkluyendo diferente mehorashon na Parke Lucha pa Libertat. Remodelashon di e kuater otro sitionan lo inkluí, entre otro, reparashon i konstrukshon di palapa, área pa BBQ, banki, plantamentu di palu i ponementu di santu nobo. Sander van Beusekom di BLEND Creative Imaging ta enkargá ku kreashon di 3 mural (di 45 meter kada un) riba e muraya di Aqualectra. E kreashon di e muralnan tin un komponente sosial kaminda PickNick Projects ta enkargá ku reklutá personanan pa forma parti di un tim ku ta asistí e artista. CTB ta ekspresá su gratitut na Aqualectra pa nan bon koperashon den kuadro di e proyekto di e muralnan.

Tur e mehorashonnan akí mester sirbi komo inisio di un proseso pa hasi Koredor un área mas agradabel pa rekreo i bienestar, tantu pa poblashon lokal komo pa turista. E proyekto “Quick Win Plan” Zakito ta duna trabou na aproksimadamente 40 persona durante e periodo di konstrukshon.

Curaçao Virtual Tourism Fair Makes Its Debut In Europe
Site Visit Quick Win Plan Zakito