Ofisina di Turismo di Kòrsou (CTB) a organisá seshon di informashon pa industria di Hospitalidat

July 1, 2020

WILLEMSTAD- 30 di yüni 2020 – Resientemente Ofisina di Turismo di Kòrsou (CTB) den kolaborashon ku Ministerio di Salubridat Públiko, Medio Ambiente i Naturalesa (GMN) i Ministerio di Desaroyo Ekonómiko(MEO) a organisá dos seshon di informashon pa stakeholders ku ta forma parti di e industria di hospitalidat. Esaki komo preparashon pa apertura responsabel di nos frontera. Durante di e seshonnan a presentá e protokòlnan ku a keda formulá huntu ku GMN i MEO pa e industria di hospitalidat. Tambe a prepará e trahadónan den sektor di hospitalidat pa e aspekto di servisio na kliente konforme e normal nobo. Un total di 164 persona a partisipá na e seshonnan.

E protokòlnan ta karga e seyo ‘A Dushi Stay, the Healthy Way’. Ku ‘A Dushi Stay, the Healthy Way’, kier komuniká ku Kòrsou ta un destinashon ku ta brinda e turista un estadia seif, saludabel i plasentero miéntras ta sigurá pa tantu e bishitante komo trahadónan den e industria ta mantené nan mes na e protokòlnan konforme e normal nobo. E seshonnan a inisiá ku palabra di bon bini na enkargo di Minister di Desaroyo Ekonómiko, Dr. Steven Martina. Seguidamente sr. Paul Pennicook, direktor di CTB a duna informashon referente e strategia di rekuperashon ku CTB a implementá. Tambe el a presentá e inisiativanan di merkadeo i relashon públiko ku ta forma parti di e plan di rekuperashon. Despues e partisipantenan a haña splikashon di e protokòlnan pa industria di hospitalidat kual a inkluí un presentashon digital di Dr. Gerstenbluth. Tur dos seshon a keda konkluí ku un workshop kaminda a trata e aspekto di servisio na kliente den e normal nobo.

Komo preparashon pa reapertura gradual i responsabel di nos frontera CTB a produsí diferente material di komunikashon spesialmente pa agentenan di biahe den eksterior i tambe e futuro bishitante. Esakinan ta inkluí; un video i un karchi digital ku ta mustra di un manera fásil kon nos destinashon a prepará pa risibí turistanan bèk. Tambe CTB huntu ku demas stakeholders a krea un portal kual ta kontené algun stap obligatorio ku e turista mester kompletá promé ku su biahe pa Kòrsou. E stapnan ta inkluí; ‘upload’ e resultado di e PCR tèst i tambe kompletá e Digital Immigration card i e Passenger Locator Card (PLC). CTB a diseñá tambe un asina yamá ‘Dushi stay’ app pa e turista kual ta inkluí entre otro un mensahe di Bon Bini, un link ku ta duna akseso na e protokòlnan, numbernan di emergensia, un link pa bai curacao.com, notisia di último momentu i mas. Na yegada na nos aeropuerto turistanan lo risibí un karchi ku ta inkluí informashon di kontakto di GMN i un notifikashon pa download e ‘Dushi stay’ app. Tambe CTB a produsí pa e industria un poster ku por keda kologá na nan propiedat pa informá e turistanan di tur e reglanan lokal manera entre otro mantenshon di distansia físiko i reglanan di higiena. Ademas e poster ta inkluí number di kontakto di GMN pa den kaso ku e turista ta eksperensia síntomanan di Covid-19.

Kòrsou meskos ku hopi pais rònt mundu tambe a keda afektá pa COVID-19. E desaroyonan relashoná ku e pandemia aki a trese un paro total den nos industria di turismo. Ku apertura responsabel di nos frontera, Kòrsou lo por kuminsá risibí turista bèk. Nos situashon normal a kambia pero huntu nos ta inisiá e kaminda pa e normal nobo.

Tur protokòl ku a keda formulá pa e industria di hospitalidat ta aksesibel riba e wèpsait korporativo di CTB kual ta curacaotouristboard.com/covidprotocols

Most recent