WILLEMSTAD- 13 di desèmber 2019 – Resientemente Minister Giselle Mc William huntu ku CTB a bishitá e hóbennan ku ta forma parti di e MLB Elite program pa pone nan mes na altura di e progreso di e programa aki na Kòrsou. E MLB Elite program ta e programa di Major League Baseball (MLB) guiá pa coachnan internashonal i lokal kaminda ta train hóbennan tantu riba e tereno deportivo komo desaroyo personal pa asina bira prospekto pa forma parti di MLB. E programa na Kòrsou ta tumando lugá ya pa 2 aña. Diferente hóben a pasa den e programa i ya ta representando nos pais den eksterior. E coachnan di e programa a kompartí informashon di e prestashon di e hóbennan di Kòrsou. E hóbennan ta hopi motivá i ta duna tur di nan banda pa por alkansá nan meta kual ta di forma parti den futuro serkano di MLB. Sra. Mc William a dirigí su mes na e hóbennan i a motivá nan pa ta ekselente tantu riba tereno komo den nan bida personal. CTB ta sigui sostené e Curaçao MLB Elite program mirando e promoshon enorme pa Kòrsou ku nos hóbennan ku ta forma parti di MLB ta sòru pe. Minister Mc William i CTB ta deseá e hóbennan tur kos bon ku nan partisipashon na e Curaçao MLB Elite Program.
