pa komunidat lokal i turistanan
WILLEMSTAD – 6 di yüli 2026 – E baño públiko kaminda ferry ta mara parti Punda a keda renobá i ta habrí bèk pa komunidat di Kòrsou i turistanan. E baño públiko ta habrí di djaluna pa djasabra di 9:00 AM pa 5:00 PM, riba dianan di fiesta i riba dianan ku tin barku krusero den haf. E proyekto a keda realisá dor di Ofisina di Turismo di Kòrsou (CTB) den kolaborashon ku Downtown Management Organization (DMO) komo parti di e kompromiso komun pa mehora e kalidat, aksesibilidat i eksperensia general di Kòrsou su sentro di siudat. Apertura ofisial di e fasilidat renobá a keda hasí pa Minister di Desaroyo Ekonómiko, Roderick Middelhof.
E inisiativa ta forma parti di e esfuersonan kontinuo pa mehorá, mantené i brinda fasilidatnan di baño públiko den nos sentro di siudat dunando di e manera aki un kontribushon na un Punda limpi i higiéniko. Pues awor tin 2 fasilidat di baño públiko habrí parti Punda, unu na Waterfort Boogjes i esun na e terminal di ferry parti Punda kual ta enfrente di e Curaçao Information Center ku CTB a inougurá na novèmber 2025. Pa hasi uso di e bañonan públiko mester hasi un kontribushon di 1 florin Karibense / 1 dòler. Un apelashon na usuarionan pa yuda mantené e bañonan limpi.
