WILLEMSTAD – 16 di òktober 2026 –Ofisina di Turismo di Kòrsou (CTB) ta informá ku durante sèptèmber 2026, Kòrsou a risibí 63.565 turista di estadia, 18% mas ku na sèptèmber 2025. Tradishonalmente sèptèmber ta un di e lunanan mas trankil di aña, sinembargo Kòrsou a registrá un kresementu kontinuo di bishitante, sostené pa yegadanan for di diferente merkado.
Prestashon luna di sèptèmber:
Durante sèptèmber 2026, Kòrsou a registrá 63.565 turista di estadia kompará ku 53.672 na sèptèmber 2025. E turistanan aki a keda 510.824 anochi na Kòrsou, un oumento di 14%, ku un estadia promedio di 8.0 anochi (8.3 na sèptèmber 2025). Den término di kresementu: yegadanan for di Karibe a subi ku 37%, Sur Amérika ku 28%, Nort Amérika ku 23% i Europa ku 8%. Pa loke ta trata akomodashon, 55% di e bishitantenan di estadia a skohe pa resort hotels, miéntras 45% a opta pa otro opshon di akomodashon. E kantidat di turista krusero a totalisá 57.621 pasahero riba 17 bishita di barkunan krusero, esaki ta un oumento kompará ku 32.372 pasahero riba 9 bishita aña pasá.
Prestashon tòp 3 merkadonan na sèptèmber 2026:
Hulanda ta sigui ta Kòrsou su merkado prinsipal, ku un total di 18.740 turista di estadia (29% di e total di yegadanan), un oumento di 6% kresementu kompará ku sèptèmber 2025. Turistanan hulandes a keda un promedio di 11.8 anochi, e estadia di mas largu di tur e merkadonan prinsipal; 56% a skohe otro opshon di akomodashon, miéntras 44% a skohe pa resort hotels. Sigun e resien Exit Survey (2025) di CTB, turistanan hulandes ta gasta un promedio di $206 pa persona pa dia.
Estádos Unídos a okupá di dos lugá ku 15.876 turista di estadia, un oumento di 20% kompará ku sèptèmber 2025. Bishitantenan merikano a keda un promedio di 5.8 anochi; 68% a skohe pa resort hotels, miéntras 32% a keda den otro opshon di akomodashon. Bishitantenan merikano ta esnan ku ta gasta mas pa dia entre e merkadonan prinsipal pa Kòrsou, ku un promedio di $407 pa persona pa dia.
Colombia a okupá di tres lugá ku 4.737 turista di estadia, un oumento di 25% kompará ku sèptèmber 2025. Bishitantenan kolombiano a keda un promedio di 5.4 anochi, un oumento kompará ku 5.0 anochi aña pasá; 63% a skohe resort hotels, miéntras 37% a keda den otro opshon di akomodashon. Bishitantenan kolombiano ta gasta un promedio di $275 pa persona pa dia.
Prestashon di yanüari – sèptèmber 2026:
For di yanüari te ku sèptèmber 2026, Kòrsou a risibí 642.379 turista di estadia, un oumento di 11% kompará ku e 581.144 registrá den e mesun periodo na 2025, generando 5.3 mion anochi di bishitante (+10%). Hulanda a keda e merkado di mas grandi ku 196.350 turista di estadia (31%), sigui pa Estádos Unídos ku 169.714 (26%). Colombiana di tres lugá ku 44.072 turista (7%), dilanti di Canada ku 36.676 (6%), Brazil ku 33.403 (5%) i Argentina ku 30.358 (5%). Turistanan krusero a registrá 648.450 pasahero te ku sèptèmber 2026, un oumento di 10%. Ku kresementu registrá tur luna e aña aki, Kòrsou ta bon posishoná pa un klousura fuerte di 2026.
