WILLEMSTAD – 26 di mei 2026 –Riba Dia Internashonal di Biodiversidat kual ta keda konmemorá riba 22 di mei, Ofisina di Turismo di Kòrsou (CTB) a firma un memorandum of understanding (MOU) ku Curaçao Outdoor Industry Alliance (COIA) pa fortalesé Kòrsou su kompromiso ku turismo sostenibel, konservashon di medioambiente i embolbimentu di komunidat. E kolaborashon ta aliniá ku e resolushonnan i prioridatnan identifiká durante e National Tourism Conference na 2024 i e metanan di CTB su departamentu di produkto stipulá pa aña 2026. Ku e akuerdo aki tur dos organisashon ke sigui posishoná Kòrsou komo un destinashon kaminda turismo, biodiversidat, herensia kultural i protekshon di medioambiente ta kana huntu. E akuerdo a keda firmá, den presensia di Minister di Desaroyo Ekonómiko, sr. Roderick Middelhof, pa sr. Muryad de Bruin, direktor di CTB i sr. Terence Ching, presidente di COIA.
E áreanan ku ta forma parti di e MOU ta entre otro, restourashon i maneho ekológiko, edukashon i defensa ambiental, integrashon di turismo sostenibel, embolbimentu di komunidat, kolaborashon den investigashon, desaroyo di infrastruktura sostenibel i mehorashon di práktikanan i regulashonnan turístiko ku ta responsabel pa ku medio ambiente.
E dos partidonan a komprometé nan mes pa traha huntu pa krea un impakto positivo pa tantu nos komunidat lokal komo nos turistanan.
