Ku artíkulo den Forbes i PEOPLE Magazine
WILLEMSTAD – 10 di sèptèmber 2025 – Curaçao North Sea Jazz Festival (CNSJF), e evento musikal di mas grandi den region Karibe un biaha mas tabata espektakular! Manera semper ta e kaso, Ofisina di Turismo di Kòrsou (CTB) den estrecho kolaborashon ku Fundashon Bon Intenshon i MOJO ta promové e festival den tur merkado prinsipal. E aña aki tambe e festival a hala atenshon di tantu prensa internashonal komo gustadónan di festival. Ademas, CTB a trese 29 prensa i influencers for di eksterior pa bin kubri e gran evento aki. Tur e akshonnan aki a resultá den un bon promoshonpa Kòrsou den entre otro revistanan online renombrá manera Forbes i PEOPLE Magazine. Tur dos artíkulo alkansando miónes di persona. E artíkulonan ta pone énfasis riba loke ta hasi CNSJF úniko, e lineup di artistanan grandi ku a forma parti di CNSJF 2025 i e bunitesa di Kòrsou komo esenario pa e festival. Ademas por a tuma nota di e gran promoshon ku Kòrsou ta risibiendo di e artistanan ku a forma parti di CNSJF 2025 kualnan a kompartí videonan elektrisante di nan presentashon.
Den e artíkulo di Forbes e periodista ta relatá for di su propio eksperensia Kòrsou i e festival ilustrando e 5 motibunan dikon bo mester eksperensiá CNSJF. Poniendo énfasis riba entre otro e bunitesa di Kòrsou, nos idioma, e diversidat di artistanan na e festival i e variedat di kumindanan ku ta keda ofresé. E artíkulo di People Magazine kual a alkansá un oudiensia di riba 10 mion a pone énfasis riba entre otro Kòrsou komo destinashon, tur loke e festival ta ofresé, e artistanan grandi ku a forma parti di e lineup i nan a indiká ku ta trata di un evento ku ta brinda un eksperensia eksepshonal i memorabel. Tur dos artíkulo a keda kompañá ku potrètnan kolorido i espektakular di e festival.
E aña aki CTB a invitá un total di 29 prensa i influencers for di eksterior pa bin kubri CNSJF. Nan ta prosedente di: Estádos Unídos, Colombia, Sürnam, Venezuela, Brasil, Chile, Hulanda, Aruba, Jamaica i Alemania. E periodistanan a representá medianan manera: Radio Caracol, 103.9 FM Mas Musica, O Globo, UOL, Venevision, Circuito Radial X89FM, Circuito Lider FM, CNN en Español, TVN Chile, Canal 90, STVS, Radio 10, Supreme tv, Hollywood Reporter, Refinery 29 Somos, PEOPLE Magazine, Cool Jazz, MusikWoche, Villa D’ Arte, JFK i Edge 105FM.
CTB ta felisitá Fundashon Bon Intenshon ku otro edishon di CNSJF riba nivel haltu i ta ansioso pa sá kua lo ta e artistanan pa CNSJF 2026.
