Durante Kids Tourism Experience 2026
WILLEMSTAD – 22 di yüli 2026 – Resientemente Ofisina di Turismo di Kòrsou (CTB) a organisá otro edishon di Kids Tourism Experience (KTE) introdusiendo Kòrsou su industria di turismo naalumnonan di skol di fundeshi i skol spesial. Komo parti di e proyekto, e muchanan a partisipá na tournan bou di guia, workshop edukativo, demostrashonnan i aktividatnan interaktivo. E muchanan por a hasi pregunta, konosé profeshonalnan den e industria di turismo i haña un mihó komprondementu kon e diferente sektornan ta traha huntu pa krea e produkto turístiko. Un total di 1006 alumno di 36 skol a partisipá na KTE2026.
KTEta e komponente práktiko di introdukshon di turismo na skol. Meta di KTE ta pa transformá loke e alumnonan a siña den klas den eksperensianan real. Kada skol a bishitá un atrakshon òf un negoshi. Esakinan a inkluí Hòfi Mango, Parke Nashonal Shete Boka i gròt di Hato, kaminda e studiantenan a deskubrí e beyesa natural i e historia riku di Kòrsou. A bishitá tambe hotèlnan pa siña tokante e variedat di karera den industria hotelero; tambe museonan, aeropuerto i Mega Pier, kaminda nan a haña un mihó komprondementu di e diferente sektornan ku ta forma parti di e industria di turismo. Algun a partisipá na un seshon di pintamentu na Área di Rekreashon Marie Pampoen òf a bishitá Amazonia, kaminda nan a disfrutá di un tour i a eksperensiá e momentu ku tabata duna e animalnan kuminda.
CTB ta gradisí tur e partnernan ku a forma parti di e proyekto aki: Curaçao Ecocity Projects (Curaloe), Papagayo Beach Curaçao, Hofi Mango, Caribbean Fun Tours Curaçao, FBTT Travel, Corendon Hotels & Resorts, Curaçao Sea Aquarium, Courtyard by Marriott Curaçao, Curaçao Hato Caves, Curaçao Activities, Curaçao Liqueur Distillery – Landhuis Chobolobo, Avila Beach Hotel, Chichi Garden, Landhuis Bloemhof, Parasasa Hotel Curaçao, Dreams Curaçao Resort, Spa & Casino, Children’s Museum Curaçao, Curaçao International Airport, Mangrove Park, Shete Boka, Brion City Hotel, Curaçao Interactive Experience, Museo Kas di Pal’i Maishi, Acoya Curaçao Resort, Villas & Spa, Jewish Museum Curaçao, Stichting Uniek Curaçao, Curaçao Ports Authority i Amazonia: The Jungle Experience.
