WILLEMSTAD – 11 di yüni 2026 –Ofisina di Turismo di Kòrsou (CTB) ta raportá ku turismo di estadia a mantené un trayektoria positivo di kresementu na mei 2026. Durante luna di mei, Kòrsou a risibí un total di 65.144 turista di estadia, representando un kresementu di 10% kompará ku mei aña pasá.
E datonan di e profil di bishitante ta indiká ku mayoria turista di estadia a bini pa vakashon (87%), siguí pa bishitanan relashoná ku negoshi (4%) i bishitá na famia i konosínan (3%). Turistanan a keda Kòrsou un averahe di 7.8 anochi, reflehando tempu signifikante pasá riba Kòrsou. E estadianan largu aki ta sigui sostené partisipashon amplio den ekonomia lokal, ku benefisio pa akomodashonnan, restorantnan, servisionan di transporte i operadornan di tour.
Prestashon tòp 3 merkadonan na luna di mei 2026
Hulanda ta sigui ta Kòrsou su merkado prinsipal na luna di mei 2026, ku un total di 20.672 turista ku ta 9% kresementu kompará ku mei 2025. Turistanan hulandes ta representá 33% di tur turista di estadia ku a bishitá nos pais durante mei. Mas ku mitar (54%) a opta pa un otro opshon di akomodashon ku no ta resort, miéntras 46% a skohe pa un resort hotel. E turistanan aki a keda un promedio di 11.3 anochi durante nan bishita.
Estádos Unídos ta e di dos merkado mas grandi pa Kòrsou, kontribuyendo ku 18.658 turista di estadia na mei 2026, kual ta 8% kresementu kompará ku e mesun luna na aña pasá. Turistanan merikano ta representá 29% di tur turista di estadia ku a bishitá Kòrsou durante mei. Resort hotels ta e eskoho di akomodashon preferí pa turistanan merikano, un total di 67% a skohe pa Resort hotels miéntras 33% a opta pa otro opshon di akomodashon. Turistanan prosedente di Estádos Unídos a keda un promedio di 5.5 anochi na Kòrsou.
Colombia ta sigui demostrá kresementu fuerte ku 4.523 turista di estadia na mei 2026, kual ta un kresementu di 14% kompará ku mei 2025. Bishitantenan di Colombia ta representá 7% di tur turista di estadia ku a bishitá Kòrsou durante mei. Resort hotels ta e eskoho di akomodashon preferí pa turistanan kolombiano (63%) miéntras nan a keda un promedio di 5.3 anochi.
Monitoreo kontinuo
Turismo di estadia ta sigui demostrá kresementu sólido na mei 2026, sostené pa resultadonan positivo for di e merkadonan prinsipal. E tendensia positivo aki a keda reflehá den e resultadonan akumulá te ku awor alkansando 374.216 turista entre yanüari i mei 2026, kompará ku 342.554 durante e mesun periodo na 2025, representando 9% kresementu. Kantidat di anochi a krese ku 10% durante e promé 5 lunanan di e aña aki reflehando un oumento den aktividat turístiko i fortalesiendo e kontribushon di e sektor na ekonomia lokal. E resultadonan aki ta resaltá e fortalesa di e sektor turístiko di Kòrsou i ta suprayá e importansia den mantené un maneho balansá di desaroyo turístiko, sostené kresementu ekonómiko miéntras ku ta preservá e karakter úniko di e isla i e kalidat di bida di su habitantenan.
