Pa selebrá Kòrsou su promé partisipashon na Kopa Mundial di FIFA
WILLEMSTAD – 5 di yüni 2026 –Pa selebrá Kòrsou su promé partisipashon na Kopa Mundial di FIFA 2026, Ofisina di Turismo di Kòrsou (CTB) huntu ku Curoil ta introdusí e Blue Wave Village na Houston, Texas. E Blue Wave Village a keda kreá pa fanátikonan di Kòrsou i fanátikonan di futbòl en general na Houston por bini huntu i selebrá Kòrsou su partisipashon na Kopa Mundial komo e pais di mas chikí den historia. Kòrsou lo trese su kultura vibrante, sabor i músika aya na Houston. Merka ta un di e merkadonan fuerte pa Kòrsou i ta forma parti importante di CTB su plan promoshonal. Despues di e partido entre Kòrsou i Alemania, e ambiente ta sigui den e Blue Wave Village, pa konektá i selebrá Kòrsou su promé partisipashon na Kopa Mundial i alabes por wak e partido entre Hulanda i Hapon riba pantaya grandi. Durante un rueda di prensa, sr. Muryad de Bruin, direktor di CTB a trese tur informashon dilanti. Entrada pa e Blue Wave Village ta grátis pero mester registrá via wèpsait di CTB, curacaotouristboard.com
Registrashon ta limitá na un ticket pa persona. E ticket ta komplementario i no por pasa esaki pa otro persona ni tampoko bende esaki. Solamente personanan ku a kumpra nan ticket via FFK òf dirèkt via FIFA por registrá pa haña akseso na e Blue Wave Village. Media internashonal i influencers tambe lo djòin e Blue Wave Village. Blue Wave Village ta un ekstenshon di Blue Nation, selebrando nos dushi Kòrsou. Entradanan ta limitá. Pa registrá, bishitá curacaotouristboard.com.
