WILLEMSTAD – 20 di mei 2026 – Ofisina di Turismo di Kòrsou (CTB) den presensia di Minister di Desaroyo Ekonómiko, sr. Roderick Middelhof a firma un akuerdo nobo di patrosinio ku Curaçao Little League Foundation pa un periodo di 2 aña. Ku esaki, CTB ta afirmá su kompromiso ku deporte hubenil i promoshon di Kòrsou komo destinashon turístiko internashonalmente. E akuerdo ta enserá un aporte finansiero di 2 aña pa yuda e fundashon kubri gastunan relashoná ku partisipashon na kampeonatonan internashonal di Little League. E akuerdo a keda firmá pa sr. Muryad de Bruin, direktor di CTB i sr. Urny Florán, District Administrator di CLLF.
Partisipashon di e hóbennan aki na torneonan internashonal ta generá ‘exposure’ balioso pa Kòrsou. Despues di kada partido, CTB ta mira un oumento den e kantidat di bishitantenan for di eksterior ku ta subi riba curacao.com pa sa mas di Kòrsou. CTB ku sosten di Gobièrnu di Kòrsou ta sigui ku su esfuersonan pa promové turismo pa medio di deporte.
