E partnership, anunsiá na CARMABI Research Station, ta indiká un kompromiso komun pa selebrá i protehá e ekosistema ekstraordinario di Kòrsou
WILLEMSTAD – 4 di mei 2026 – Ofisina di Turismo di Kòrsou (CTB) i WOW! The Nature Film, awe a anunsiá un partnership stratégiko pa mustra e islanan di Karibe Hulandes— ku Kòrsou komo punto prinsipal — na mundu for di e bista di e kriaturanan di naturalesa ku ta yama e islanan aki nan kas. E anunsio a tuma lugá durante un konferensia di prensa na CARMABI Research Station, un lokashon simbóliko den kurason di Kòrsou su legado sientífiko i di konservashon.
WOW! The Nature Film ta un proyekto multimedia dediká na e ekosistema di Karibe Hulandes. E proyekto lo mustra e seis islanan di Karibe Hulandes na diferente manera. Entre otro via un pelíkula pa sine, 6 dokumentario ku ta resaltá e relashon entre hende i naturalesa riba e islanan, un podcast i programanan edukashonal. Pa medio di storytelling i sinematografia di nivel haltu (bou di awa), WOW! tin komo meta pa inspirá atmirashon i krea konsientisashon tokante e rikesa i aspektonan frágil di e medioambientenan aki.
Pa CTB, e partnership ta un ekstenshon natural di su mishon pa presentá Kòrsou no solamente komo un destinashon, pero komo un eksperensia basá riba outentisidat i bunitesa natural. Banda di e refnan internashonalmente konosí, Kòrsou ta ofresé un variedat di maravianan natural manera, bahianan skondí, matanan di palu di mangel i serunan impreshonante, kada un ta kontribuí na e atrakshon di Kòrsou riba tarima mundial.
E serie di dokumentario (seis episodio) ya ta kla i lo keda transmití na Hulanda entrante yüli 2026. Despues di e periodo aki, e dokumentarionan lo keda transmití riba televishon lokal.
E pelíkula mes ta planiá pa estrená na 2027. Pa medio di e partnership aki, CTB lo duna sosten na e produkshon i yuda fasilitá akseso na lokashonnan klave, miéntras lo asistí pa amplia e alkanse di e pelíkula pa e públiko internashonal.
