Ya kaba 33 persona a pasa e kurso ku éksito
WILLEMSTAD – 3 di aprel 2024 – Resientemente un grupo di 12 persona ku ta laborá den industria di hospitalidat a kuminsá un kurso pa bira Leermeester / Instruktor sertifiká. E kurso di Instruktor ta forma parti di e programa di training Her & Bijscholingstraject Hospitality Sector. E instruktornan ta esnan responsabel na e leerbedrijf pa guia e kursistanan. Ya kaba un total di 33 persona a pasa e kurso di Instruktor ku éksito.
E kurso ta tuma lugá un biaha pa siman durante un periodo di 7 siman i ta konsistí di entre otro e siguiente módulonan: komunikashon, e proseso di introdukshon di un trahadó nobo, abilidatnan didáktiko, téknika di kombersashon, kon pa duna feedback, stimulá i motivá e trahadó nobo i kon pa kondusí un kombersashon di evaluashon na un manera efektivo. Minister di Desaroyo Ekonómiko, sr. Ruisandro Cijntje ta aploudí inisio di un grupo mas i ta indiká ku “e guia ku e instruktor ta duna ta sumamente importante i ta kontribuí na un mihó resultado di e kursistanan ku ta sigui e programa di training pa industria di hospitalidat. Na mes momentu e programa di training ta duna un kontribushon na e industria dor di invertí den ekipá mas persona ku ta traha den e industria pa por ehersé e funshon di instruktor. Esaki na benefisio no solamente di e programa di training aktual pero den futuro e konosementu atkerí por keda usá pa guia tur otro trahadó ku bai laborá na e kompania”.
E programa di training, Her & Bijscholingstraject Hospitality Sector ta resortá bou di Ministerio di Desaroyo Ekonómiko (MEO) miéntras Ofisina di Turismo di Kòrsou (CTB) ta responsabel pa implementashon di e programa. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Den e periodo tras di lomba a ehekutá training di guia turístiko, resepshonista, dunadó di masashi, asistente di kòki, weiter, asistente di bartènder, artesano i housekeeping. Mas di 30 kompania ta kontribuyendo na e proyekto komo leerbedrijf brindando e partisipantenan un oportunidat pa por praktiká i alabes haña un trabou den industria di hospitalidat. E programa di training ta den su rekta final. Pa registrá bai riba www.curacaotouristboard.com/education/
