durante ITB Berlin 2024
WILLEMSTAD – 19 di mart 2024 – Resientemente un tim di Kòrsou konsistiendo di representantenan di Ofisina di Turismo di Kòrsou (CTB), Curaçao Airport Partners (CAP) i diferente partner di sektor privá a partisipá na ‘Internationale Tourismus-Börse’ (ITB) na Alemania. Ta trata di e feria turístiko internashonal di mas grandi dirigí riba negoshi. E aña aki, ITB a konta ku un kantidat di 5500 ekspositor representando 170 pais i a atraé mas di 100 mil bishitante. Meta prinsipal di Kòrsou su partisipashon tabata pa estrechá lasonan komersial ku partnernan na Alemania. Durante e feria di 3 dia, e tim di Kòrsou a reuní ku entre otro operadornan di tour, agensianan di biahe ku ta aktivo online, aerolíneanan i prensa dirigí riba komersio.
Meta prinsipal di e kombersashonnan sostené tabata pa di un forma stratégiko elaborá riba akshonnan kolaborativo pa oumentá e kantidat di bishitantenan for di Alemania pa Kòrsou. Diferente di e operadornan di tour a indiká di bai ekspandé nan portafolio di Kòrsou ku mas di nos akomodashonnan i atrakshonnan turístiko miéntras otronan a indiká di lo bai inkluí Kòrsou komo un destinashon nobo den nan portafolio. Durante ITB 2024, CTB a hasi uso tambe di e oportunidat pa introdusí na partnernan di komersio na Alemania e manager nobo pa region di Europa, sra. Susan Vrolijk.
Un danki ta bai na e partnernan di sektor privá ku a forma parti di e tim di Kòrsou durante ITB 2024; Coral Estate Luxury Resort, Curaçao Marriott Beach Resort, LionsDive Beach Resort Curaçao, Renaissance Wind Creek Curaçao Resort, Sandals Royal Curaçao, FBTT, Morena Eco Resort, Acoya Curaçao Resort, Villas & Spa, Mangrove Beach Corendon Curaçao All-Inclusive Resort, Curio by Hilton i Blue Bay Curaçao Golf & Beach Resort. Alemania ta keda un merkado importante pa Kòrsou p’esei partisipashon na tipo di ferianan manera ITB ta sumamente importante pa huntu ku partnernan komersial manera entre otro operadornan di tour i aerolíneanan interkambiá riba e posibilidatnan pa atraé mas bishitante pa nos destinashon.
