WILLEMSTAD- 22 di febrüari 2024 – Resientemente e di 65 edishon di Vakantiesalon Brussel a tuma lugá na Brussels Exhibition Centre. Ta trata aki di e feria nashonal di turismo di mas grandi na Bèlgika ku 248 ekshibishonista i ku a konta ku partisipashon di riba 70 mil bishitante. E aña aki Ofisina di Turismo di Kòrsou (CTB) a djòin e stènt di Corendon pa duna informashon di Kòrsou. Corendon tabatin e stènt di mas grandi kual sigur a hala atenshon di tur bishitante di e feria.
Den e stènt di Corendon, e tim di CTB tabatin un podio dekorá den esfera di playa na entrada di e feria. E músika tabata na enkargo di DJ Brian K kende tin raisnan Kurasoleño, e tabata toka kantikanan ku ta laga e bishitantenan sinti nan na un di e fiestanan popular na un di e playanan na Kòrsou. Durante henter dia e tim di CTB a duna diferente presentashon invitando e bishitantenan di e feria pa bishitá Kòrsou i asina eksperensiá e produkto turístiko úniko ku Kòrsou ta ofresé. Banda di duna informashon balioso, e tim di Corendon den kolaborashon ku CTB a organisá un rifa kual a inkluí premionan manera un trep pa Kòrsou pa 2 persona. Ademas, e tim a sòru pa un área pa mucha ku aktividatnan interesante manera un kompetensia di klùr. Tur mucha ku a partisipá den e kompetensia a risibí un tas ku regalito. Aunke no tin buelo direkto for di Bèlgika pa Kòrsou, CTB ta keda aktivo den e merkado promoviendo konekshonnan kumbiniente via Hulanda pa yega Kòrsou.
