Durante New York Travel & Adventure Show 2024…
WILLEMSTAD- 20 di febrüari 2024 – E aña aki Ofisina di Turismo di Kòrsou (CTB) huntu ku 12 partner di sektor privá a partisipá na e edishon mas resien di New York Travel & Adventure Show. Ta trata aki di e feria di konsumidó di mas grandi di Estádos Unídos, kual a brinda e plataforma ideal pa presentá Kòrsou su produkto turístiko na potensial bishitantenan. E feria a tuma lugá na Jacob K. Javits Convention Center na New York. Durante dos dia e tim di Kòrsou a presentá e produkto turístiko úniko ku Kòrsou tin di ofresé. E aña aki, Kòrsou a gana e prestigioso premio ‘Best in Show’ pa e stènt di mas bunita.
E mensahe prinsipal dirigí na tur bishitante di e stènt di Kòrsou tabata, ‘Bin Kòrsou i sintié pa bo mes’. Riba pantayanan grandi den e stènt di Kòrsou, e bishitantenan por a opservá paisahenan pintoresko, diferente opshon di akomodashon i un variedat di aktividat interesante ku por hasi na Kòrsou. Tur ku a bishitá e stènt di Kòrsou a haña informashon tokante e variedat amplio di atrakshonnan turístiko, huntu ku paketenan interesante pa konosé nos isla dirigí riba individual òf grupo. Ademas, nan a risibí informashon di paketenan atraktivo di e diferente akomodashonnan ku tabata presente den e stènt di Kòrsou.
CTB ta gradisí partnernan di sektor privá, Acoya Curaçao Resort, Villas & Spa, Renaissance Wind Creek Curaçao Resort, Kontiki Beach Resort, Zoëtry Curaçao Resort & Spa, Dreams Curaçao Resort, Spa & Casino, Sunscape Curaçao Resort, Spa & Casino, LionsDive Beach Resort Curaçao, Curaçao Marriott Beach Resort, Papagayo Beach Hotel & Papagayo Beach Resort, Brion City Hotel, Curaçao Activities & TMC and IRIE Tours pa nan partisipashon den e stènt di Korsou. Un danki ta bai tambe na BlueFinn Charters Curaçao, Dive Center Scuba Do Curaçao i Landhuis Chobolobo ku a promové Kòrsou den nan respektivo stènt. New York Travel & Adventure Show a resultá un biaha mas un oportunidat fantástiko pa promové Kòrsou komo e destinashon number unu den Karibe!
