Ku kasi 300 partisipante……
WILLEMSTAD – 1 di febrüari 2024 – Turismo ta un industria orientá riba servisio, kaminda satisfakshon di e kliente ta sumamente importante. Ora biaheronan tin un eksperensia positivo, nan tin mas chèns di bolbe bishitá Kòrsou i di rekomendá nos destinashon na otronan. Saliendo for di e punto di bista aki, Ofisina di Turismo di Kòrsou (CTB) a organisá un seminario ku e meta prinsipal pa duna un kontribushon na elevá e kalidat di servisio ku ta keda duná tantu na turistanan komo tambe na pueblo lokal. E seminario a keda guiá pa e eksperto sr. Jonatan Loidi ku tin un sertifikashon di e instituto di Disney riba e tópikonan, kalidat di servisio i tambe liderazgo. Kasi 300 persona ku ta sea direktamente òf indirektamente envolví ku e industria di turismo a partisipá na e seminario kual a keda ofresé di forma gratuito.
E seminario a inisiá ku palabranan di bon bini na enkargo di Minister di Desaroyo Ekonómiko, sr. Ruisandro Cijntje siguí pa un presentashon di sr. Andre Rojer (CTB) tokante desaroyo di turismo di Kòrsou i e produkto turístiko ku Kòrsou ta ofresé. Mas aleu, sr. Loidi a deskribí e modelo di duna servisio di Disney World ku énfasis riba kon pa apliká esaki den un organisashon. El a hasi uso di ehèmpelnan simpel ku por ta aplikabel den diferente sektor. Tambe el a para ketu na entre otro e siguiente tópikonan: e kliente ta sentral, ekspektativa kompará ku realidat, aktitut, liderazgo ku énfasis riba servisio i kalidat. Sr. Liodi tin hopi eksperensia i ta ofresé seminarionan na diferente parti di mundu. Pa e partisipantenan e seminario a ofresé un tremendo oportunidat pa haña e hèrmèntnan nesesario pa nan sigui desaroyá nan abilidatnan i sigui elevá e nivel di servisio na kliente sea ku ta nos hendenan lokal òf turista.
E seminario a konta ku partisipashon di entre otro: hotèl, restorant, aeropuerto, akomodashonnan chikí, atrakshonnan, shofùrnan di taksi, operadornan di tour, agentenan di biahe, guia turístiko, kompanianan di seguridat i departamentunan di Gobièrnu. Ofisina di Turismo di Kòrsou ta keda dediká na invertí den proyektonan ku tin komo meta pa elevá e eksperensia turístiko total.
