Buelo semanal riba djasabra
WILLEMSTAD- 16 di desèmber 2023 – E dia tan antisipá a yega, e konekshon direkto di Delta Air Lines for di Atlanta, Georgia a baha na Kòrsou. E skema di buelo di e aerolínea ta inisiá ku 1 buelo semanal riba djasabra. Adishonalmente, riba 26 di desèmber próksimo i 2 di yanüari 2024, e aerolínea lo inkorporá un buelo adishonal riba nan skema regular. Atlanta ta un hub importante pa Delta, brindando e oportunidat na bishitantenan for di vários siudat na Merka, pa por konektá fásil pa bini Kòrsou. E buelonan lo keda efektuá ku un Boeing 738 ku un kapasidat di 160 stul. Na yegada di e promé buelo na nos aeropuerto e avion a keda risibí ku e tradishonal saludo di awa.
Durante e selebrashon a hiba palabra, Minister di Desaroyo Ekonómiko, sr. Ruisandro Cijntje, Minister di Tráfiko, Transporte i Planifikashon Urbano, sr. Charles Cooper, sra. Jennifer Rabun, Field Director Caribbean di Delta i sr. Jonny Andersen, CEO di CAP. Mas aleu, Minister Cijntje, Minister Cooper i sr. Muryad de Bruin (CTB), huntu ku representantenan di CAP i CAH a hasi entrega di un plakat konmemorativo na Delta, ilustrando nos bunita Handelskade i nos famoso Koningin Emmabrug konosí komo ‘Swinging Old Lady’.
Delta tabata bula e ruta Kòrsou kaba den pasado i awor despues di 13 aña ta reinisiá su konekshon ku nos isla. Merka ta un merkado importante pa Kòrsou, e konekshon direkto entre Atlanta i Kòrsou ta brinda e posibilidat pa mas turista bin eksperensiá tur loke Kòrsou tin pa ofresé, nos produkto turístiko úniko i tambe nos hendenan amabel. Na mes momentu e buelo direkto di Delta ta brinda mas opshon di biahe pa nos pueblo lokal. Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Delta ku nan ruta Atlanta – Kòrsou!
