Surpasando tur ekspektativa….
WILLEMSTAD – 15 di desèmber 2023 – Ofisina di Turismo di Kòrsou ta raportá un kantidat di 519.016 turista di estadia den e 11 lunanan di 2023, kual ta un kresementu di 17% kompará ku mesun periodo na aña pasá. Aña pasá, un total di 444.635 turista di estadia a keda risibí den e mesun periodo. Manera anunsiá 20 di novèmber último, un total di 500 mil turista di estadia a keda risibí te na e momentu ei. Ku solamente 1 luna mas pa bai di aña 2023, ku gran satisfakshon CTB ta anunsiá ku aña 2023 ta e aña ku a kibra rèkòrt den kantidat di turista di estadia. Desèmber ta konosí histórikamente komo un di e lunanan ku e mihó prestashon. Ku e servisio aéreo adishonal programá den luna di desèmber, CTB ta mirando kaba un prestashon impreshonante di e promé mitar di luna di desèmber, kual ta duna un indikashon ku desèmber lo ta e luna ku mihó prestashon kompará ku tur e otro lunanan di 2023.
E imágen abou ta mustra e prestashon mensual di 2023 kompará ku e meta mensual i e kantidat di turista risibí na aña pasá.
Resultadonan notabel turista di estadia novèmber 2023:
Na luna di novèmber, Kòrsou a risibí un total di 52.179 turista di estadia kual ta 18% mas ku e 44.058 turista di estadia risibí na novèmber 2022. Te ku aworakí, novèmber ta e luna ku mihó prestashon den sifranan apsoluto kibrando e rèkòrt di e luna ku anteriormente tabatin e mihó prestashon den sifranan apsoluto kual tabata luna di yüli 2023, na momentu ku 50.937 turista di estadia a keda registrá. E paisnan ku mihó prestashon den sifranan apsoluto di turista di estadia risibí ta: Hulanda, Estádos Unídos, Colombia, Canada i Brazil. Huntu e 5 paisnan aki ta representá 78% di e kantidat total di turista risibí.
Turistanan for di Hulanda: Nos merkado primario a eksperensiá un bahada leve registrando 2% ménos turista di estadia, ku un total di 18.326 turista hulandes na novèmber 2023. Ta trata di 389 turista ménos kompará ku novèmber 2022. Ku introdushon di e buelo 3 biaha pa siman for di Amsterdam ku Corendon Airlines i e oumento di buelo di TUI, ta notabel ku e kantidat di turista di estadia for di e merkado hulandes ta yega serka di e nivel di turista di estadia mensual manera tabata e kaso den aña 2022. CTB ta pronostiká un kresementu den kantidat di turista di estadia for di Hulanda den luna di desèmber na momentu ku Corendon Airlines oumentá su buelonan na 5 pa siman entrante 16 di desèmber, TUI bula 2 biaha pa dia henter luna di desèmber i KLM lo tin 2 buelo diario den e delaster siman di desèmber.
Turistanan for di Estádos Unídos: E merkado di Estádos Unídos a sigui mustra un kantidat stabil di turista di estadia registrando un total di 11.207 turista na novèmber, 20% kresementu kompará ku novèmber 2022. Kòrsou a risibí un kantidat remarkabel di 126.461 turista den e promé 11 lunanan di 2023. E kantidat di turista risibí for di Estádos Unídos ta representá te na e momentunan aki 24% di e total di turista di estadia risibí den e promé 11 lunanan di 2023. CTB ta antisipá ku e merkado aki tambe lo kontribuí na un aña di turismo espektakular pa Kòrsou ku lo kibra tur rèkòrt.
Turistanan for di Colombia: E kantidat di turista di estadia for di Colombia na luna di novèmber a registrá un kresementu di 79%. Ta promé biaha ku Kòrsou a risibí riba 4000 turista di estadia for di Colombia. Total 4.421 kolombiano a keda risibí na novèmber 2023. Te ku aworakí 34.008 kolombiano a bishitá nos pais den e promé 11 lunanan di aña. E kantidat di turista risibí for di Colombia ta representá 7% di e total di turista di estadia risibí den e 11 lunanan di 2023.
Turistanan for di Canada: Total 3.954 kanades a bishitá Kòrsou na novèmber 2023, esaki ta 69% mas ku e 2.335 kanadesnan registrá na novèmber 2022. Durante henter aña Kòrsou tabatin e servisio di 3 biaha pa siman ku Air Canada for di Toronto. Un total di 27.582 kanades a bishitá Kòrsou den e promé 11 lunanan di 2023. Ta pronostiká ku pa final di 2023 un kantidat di riba 30 mil kanades lo a bishitá Kòrsou. Esaki ta danki na e buelonan di Air Canada i WestJet.
Turistanan for di Brazil: Un total di 2.748 turista brasilero a keda risibí na luna di novèmber, esaki ta 222% kresementu kompará ku novèmber 2022 na momentu ku 853 brasilero a keda risibí. E konekshon direkto di 2 buelo semanal for di Belo Horizonte ku Azul Airlines i e otro opshonnan di konekshon via Panama ku Copa Airlines òf Bogotá ku Avianca, den kombinashon ku e esfuersonan kontinuo di merkadeo di Kòrsou na Brazil ta dunando fruta. Total e aña aki te ku novèmber un kantidat di 23.150 turista a keda registrá, esaki ta un kresementu di 153% kompará ku e mesun periodo na aña pasá.
E imágennan abou ta mustra primeramente e prestashon di kada region kompará ku aña pasá, inkluyendo e kantidat ku kada region ta representá den e total di turista di estadia ku a bishitá nos pais.
E di dos imágen ta ilustrá e prestashon di e tòp 5 paisnan inkluyendo e tòp 3 estadonan for di kua nos turistanan ta prosedente.
Turista di estadia, turista krusero i ‘day trippers’
Total 139.251 bishitante a bishitá Kòrsou na novèmber 2023. Manera menshoná anteriormente 52.179 turista di estadia a keda risibí kualnan a yega via di CUR airport. E turistanan aki a keda por lo ménos 1 anochi ku un máksimo di 90 dia. Tambe tin 1.915 bishitante mas ku a keda registrá via CUR airport, kual ta e personanan ku a regresá bèk riba e mesun dia ku nan a yega nos pais, e asina yama ‘day trippers’.
Di akuerdo ku Curaçao Ports Authority, un total di 85.157 turista krusero a keda registrá na luna di novèmber. E kantidat total di bishitante na luna di novèmber ta 6% mas kompará ku e mesun luna na 2022 na momentu ku 131.066 bishitante a keda risibí.
Di yanüari te ku luna di novèmber 2023 un kantidat di 1.1 mion bishitante a bishitá Kòrsou, konsistiendo di 519.016 turista di estadia, 17.314 ‘day trippers’ i 596.551 turista krusero. Aña pasá e mesun periodo un kantidat di 892 mil bishitante a keda registrá.
