buelo direkto ruta Amsterdam – Kòrsou
WILLEMSTAD- 3 di novèmber 2023 – E dia tan sperá a yega, e konekshon direkto di Corendon Airlines for di Amsterdam, Hulanda a baha na Kòrsou. E skema di buelo di e aerolínea ta inisiá ku 3 buelo pa siman te ku 15 di desèmber i entrante 16 di desèmber próksimo, Corendon Airlines lo ehekutá 5 buelo pa siman riba e ruta Amsterdam – Kòrsou. E buelonan lo keda ehekutá ku un Airbus A350 ku un kapasidat di 432 stul. Na yegada di e promé buelo na nos aeropuerto e avion a keda risibí ku e tradishonal saludo di awa.
Durante e selebrashon a hiba palabra, Minister di Desaroyo Ekonómiko, sr. Ruisandro Cijntje, Minister di Tráfiko, Transporte i Planifikashon Urbano, sr. Charles Cooper, sr. Atilay Uslu, direktor di Corendon Airlines i sr. Jonny Andersen, CEO di CAP. Mas aleu, Minister Cijntje, Minister Cooper i sr. Muryad de Bruin (CTB), huntu ku diferente dignatario a hasi entrega di un plakat konmemorativo na Corendon Airlines, ilustrando nos bunita Handelskade. E konekshon nobo di Corendon Airlines ta habri posibilidat pa mas turista for di Hulanda i otro paisnan den Europa bin eksperensiá tur loke Kòrsou tin di ofresé; un portafolio amplio di akomodashon, variedat di atrakshon turístiko, playanan bunita, nos historia riku, diferente tipo di evento, deportenan akuátiko, nos kushina krioyo i mas ku tur kos nos hendenan amabel. Introdukshon di e buelo direkto di Corendon Airlines ta brinda tambe mas opshon di biahe pa nos pueblo lokal.
Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curaçao Airport Holding (CAH) i Curaçao Hospitality & Tourism Association (CHATA) ta felisitá Corendon Airlines ku nan destinashon nobo, Kòrsou!
