Aprel e luna ku mas tantu turista di estadia

May 17, 2023

…..te na e momentunan aki den aña 2023

WILLEMSTAD- 16 di mei 2023 – Ofisina di Turismo di Kòrsou (CTB) ta raportá ku Kòrsou a risibí un total di 48.450 turista di estadia durante luna di aprel. Esaki ta 13% kresementu kompará ku aprel 2022 na momentu ku 42.715 turista di estadia a bishitá Kòrsou. E kantidat di turista registrá na aprel 2023 te na e momentunan aki ta e kantidat mas haltu di turista di estadia risibí durante e aña aki.

Pasku di Resurekshon a kai den e promé wikènt di aprel 2023 i ta konosí komo un temporada kaminda semper hopi turista ta bishitá nos isla i e aña aki tambe esaki tabata e kaso. E imágen abou ta mustra e prestashon di e lunanan di aña 2023 kompará ku aña 2022, ilustrando e prestashon positivo di e promé 4 lunanan di aña.

Kantidat di turista di estadia pa kada region na aprel 2023

E kantidat di turista di estadia for di Nort Amérika a mustra un oumento signifikante na aprel ku 92% kresementu markando un tendensia prometedor pa kresementu kontinuo for di e region aki. Total 14.198 turista a bishitá nos for di Nort Amérika.

For di Sur Amérika tin un kresementu supstansial, CTB ta raportá un kresementu di 45% den kantidat di turista di estadia. Region di Karibe tambe ta mustra kresementu, registrando 56% mas turista kompará ku aña pasá.    

Europa ta e úniko region ku a kai den kantidat di turista (-21%), no opstante esaki Europa ta keda esun promé den kantidat total di turista ku a bishitá Kòrsou. Region di Europa ta representá 43% di e total di bishitante ku a biaha pa nos pais. E imágen abou ta mustra e prestashon di kada region kompará ku aña pasá inkluyendo e kantidat ku kada region ta representá den e total di turista di estadia ku a bishitá nos pais.   

E 5 merkadonan prinsipal

Huntu e 5 merkadonan prinsipal na luna di aprel 2023 a representá un total di 35.863 (74%) turista di estadia. CTB ta mira un bahada den kantidat di turista di estadia for di Hulanda, komo konsekuensia di e bahada den  kantidat di stul for di e merkado hulandes, sinembargo dor di e diversifikashon kaminda otro merkadonan prinsipal ta presta di forma espektakular esaki ta sòru pa e prestashon total ta positivo. For di Estádos Unídos nos a registrá 81% mas turista. Un di e motibunan prinsipal pa e oumento aki ta e bon kolaborashon entre sektor públiko i privá den promoshon di Kòrsou na Estádos Unídos. Ademas for di 6 di aprel último e kantidat di buelo di JetBlue for di JFK tambe a oumentá. E imágen abou ta ilustrá e prestashon di e 5 merkadonan prinsipal inkluyendo e tòp 3 estadonan for di kua nos turistanan ta prosedente.

Akomodashon, kantidat di anochi averahe i demografia

Informashon kompilá for di e karchinan di imigrashon ta mustra ku total turistanan a keda un averahe di 8.1 anochi riba nos pais. Di tur e turistanan, un total di 62% a skohe pa keda den un resort hotel (esta hotèl grandi, chikí i bùngalo). Un total di 36% di e turistanan ku a biaha pa Kòrsou ta personanan entre e edat di  25 – 44 miéntras 33% ta entre e edat di 45 – 64. E imágennan abou ta ilustrá e akomodashon i demografia di e turistanan ku a biaha pa Kòrsou den luna di aprel 2023.

Prestashon turismo krusero

Na luna di aprel un total di 21 barku krusero a bishitá nos pais ku un total di 52.312 turista krusero. Aña pasá aprel, Curaçao Ports Authority (CPA) a raportá 19 barku krusero ku un total di 27.886 turista krusero. 

Most recent