2 i 3 di yüni 2023
WILLEMSTAD- 11 di mei 2023 – Kòrsou ta preparando pa un evento espektakular di futbòl, esta e Legends Football Tournament, kaminda èks-hungadónan konosí di futbòl di AJAX, Brazil, Colombia i Kòrsou lo bini huntu. E torneo lo tuma lugá dia 2 i 3 di yüni i ta primintí di bira un berdadero delisia pa fanátikonan di futbòl i amantenan di deporte.
Ofisina di Turismo di Kòrsou (CTB) a logra traha un line-up impreshonante, ku hungadónan manera Edwin van der Sar (AJAX), Ronald de Boer (AJAX), Fabricio Carvalho (Brazil), Faustino Asprilla (Colombia) i e legendario di futbòl di Kòrsou, Brutil Hosé. E íkononan akí lo kompetí kontra otro, representando nan pais òf klup den partidonan emoshonante di 5 kontra 5, pa purba gana e viktoria. Kada partido ta dura 2×15 minüt ku un pousa kòrtiku di 5 minüt. E rondanan preliminar ta ser hungá riba djabièrnè i djasabra, anto riba djasabra lo tin tambe e finalnan. E Legends Football Tournament a nase for di e kolaborashon ku Kòrsou tin ku klup di futbòl AJAX, ku e meta pa stimulá deporte di un manera inklusivo.
E legendarionan di futbòl ku lo partisipá na e Legends Football Tournament ta:
Brazil: Carlos Alberto Lisboa, Fabio de Nascimento, Fabricio Carvalho, Jose Roberto Gama de Oliviera “Bebeto”, Matheus Nunes da Silva “Negrete” i Túlio Pereira Costa “Maravilha”
Colombia: Faustino Asprilla, Victor Aristizabal, Faryd Mondragón, Adolfo Valencia “El Tren”, Harold Lozano
AJAX: Edwin van der Sar, Jari Litmanen, Rob Witschge, Ronald de Boer, Richard Witschge
Kòrsou: Lennox Mauris, Uriël Trustfull, Dean Gorré, Marchello Pisas, Ramiro Griffith, Brutil Hosé, Sendley Bito, Zinho Constancia
E evento lo tuma lugá na Curaçao Airport Venue, den un stadion spesial konstruí ku yerba artifisial. E stadion akí ta situá kantu di e kaminda pa bai aeropuerto, enfrente di Kueba di Hato. Karchi pa adulto ta kosta ANG 50,- i muchanan te ku 15 aña ta paga ANG 25,-. Un pakete di dos dia ta optenibel pa ANG 90,- pa adulto i ANG 40,- pa mucha. Karchinan VIP ta optenibel pa ANG 325,- pa anochi. Por kumpra karchi online na legends.curacao.com i tambe na Van Den Tweel, 24 uur uit de muur na Sta. Maria i Madero Boutique na Mambo Beach.
Dinner With the Legends
Pa habri e evento, lo tin un ‘Dinner with the Legends’ riba 1 di yüni den kolaborashon ku Rotary Club Willemstad. Durante e sena di subasta akí, e legendarionan di futbòl lo ta presente entre e invitadonan. E metanan di e evento ta pa yuda Girls League, un inisiativa di FFK pa fomentá futbòl femenino na Kòrsou i pa yuda e divishon hubenil di e ekipo di futbòl Jong Holland. E subasta lo tuma lugá di 7:00 pa 11:00 di anochi riba e tereno di Legends Football Tournament na Curaçao Airport Venue. Karchi pa e evento akí tambe ta optenibel riba e website legends.curacao.com i na e lugánan menshoná ku ta bende karchi.
