Avion di Azul ku diseño di Kòrsou

April 29, 2023

pa promové ruta Brazil – Kòrsou

WILLEMSTAD– 28 di aprel 2023 Pa promové Kòrsou komo nan destinashon internashonal nobo, e aerolínea Azul den kolaborashon ku Ofisina di Turismo di Kòrsou (CTB) a introdusí un diseño di nos Handelskade riba un di nan avionnan Airbus320neo. Azul ta e aerolínea di mas grandi di Brazil den kantidat di buelo i destinashonnan ku e aerolínea ta sirbi. E avion lo baha i subi for di mas di 50 aeropuerto lokual ta hasi posibel pa un gran kantidat di biahero tuma nota di e promoshon di Kòrsou. Handelskade ta konosí komo un di e sitionan mas ikono di nos pais. E arkitektura di e edifisionan i e kolónan briante semper ta yama atenshon di tur ku bishitá nos pais. E promé buelo di e avion ku e diseño di nos Handelskade riba dje a tuma lugá dia 26 di aprel último.

E ruta Brazil – Kòrsou lo inisiá 24 di yüni próksimo for di BH Airport na e siudat Belo Horizonte. Ya via di e wèpsait di Azul por kumpra ticket pa por bini Kòrsou. E buelo lo keda ehekutá ku un avion Airbus A320 ku un kapasidat di 174 stul. E buelo lo ta riba djasabra saliendo Brazil mèrdia i e buelo di regreso lo sali Kòrsou riba djadumingu mainta. Brazil ta un merkado kresiente pa Kòrsou i e konekshon nobo aki ta unu importante pa sigui krese e merkado.

E diseño di nos Handelskade riba e avion di Azul ta forma parti di e plan di promoshon ku CTB a akordá ku e aerolínea i lo tin un durashon di 3 luna.

Most recent