WILLEMSTAD- 27 di mart 2023 – Dia 28 di mart selekshon nashonal di futbòl di Kòrsou lo enfrentá e selekshon nashonal di Argentina inkluyendo Lionel Messi durante un partido amistoso ku lo tuma lugá na Argentina. Argentina ta un merkado kresiente pa Kòrsou pa e motibu aki Ofisina di Turismo di Kòrsou (CTB) lo hasi uso di e oportunidat pa ehekutá diferente akshon di promoshon tantu promé komo durante di e partido amistoso.
Siman pasá, CTB a distribuí un komunikado na Argentina hasiendo un invitashon pa sigui e partido i tambe invitando e argentinonan pa skohe pa bishitá Kòrsou durante nan próksimo vakashon. E komunikado a inkluí un invitashon pa bin eksperensiá nos kultura, nos playanan i tambe informashon di diferente hotèl i resort riba nos pais. Tambe a saka un eblast inkluyendo e 10 motibunan prinsipal dikon Kòrsou ta e mihó pais pa pasa vakashon. E eblast a keda distribuí via di e plataforma di industria di biahe Ladevi pa agentenan di biahe na Argentina. Tambe a distribuí un otro eblast spesial dirigí riba turistanan argentino ku a yega di bishitá Kòrsou den pasado. Ademas, e tim di CTB a aserká diferente influencers di Argentina ku a yega di bishitá Kòrsou den pasado pa nan share riba nan páginanan sosial dos dia promé ku e partido rekuerdonan dushi ku nan tin di nan bishita na Kòrsou. E informashon ku nan share riba nan páginanan sosial lo sali simultaniamente tambe riba nos kanalnan di media sosial ‘Curaçao’. Na mes momentu nan lo invitá nan siguidónan pa nan sigui e partido amistoso.
Durante di e partido amistoso mes lo tin diferente banner digital den e stadion ku promoshon di Kòrsou. Ademas, un representante di Kòrsou lo ta presente den e área di prensa pa repartí informashon i material di promoshon di Kòrsou.
CTB ta sigui hasi uso di kada oportunidat ku presentá pa hasi promoshon pa Kòrsou.
