WILLEMSTAD – 9 di mart 2023 – Federashon Hulandes di Beisbòl i Sòftbòl i Ofisina di Turismo di Kòrsou (CTB) ta anunsiá un kolaborashon durante World Baseball Classic ku a kuminsá dia 8 di mart último. E beisbolistanan di e Tim di Reino Hulandes ta hunga henter e torneo ku ‘Visit Curaçao’ (Bishitá Kòrsou) riba e manga robes di nan unifòrm.
Ku ‘Visit Curaçao’ Ofisina di Turismo di Kòrsou ta invitá biaheronan di rònt mundu pa bin bishitá nos isla Karibense ku tin asina tantu di ofresé. E konekshon entre Kòrsou ku beisbòl ta mas ku kla. E deporte ta sumamente popular riba nos isla i Kòrsou ta produsí talento di beisbòl riba nivel mundial. Pues e kontribushon di Kòrsou den e selekshon i e coaching staff di e Tim di Reino ta bastante grandi.
Nòmbernan grandi manera Didi Gregorius, Andrelton Simmons, Jonathan Schoop, Jurickson Profar i tambe Hensley Meulens i Andruw Jones ta bolbe hunga pa e Tim di Reino durante e World Baseball Classic akí, i pues nan ta hunga ku ‘Visit Curaçao’ riba nan manga.
Muryad de Bruin, Direktor di CTB: “Deporte, i en partikular beisbòl, ta un parti integral di bida na Kòrsou. Nos ta mashá orguyoso di e tantísimo talento deportivo ku nos isla ta produsí. No solamente tin hopi hungadó di Kòrsou den Major League Baseball di Merka, pero tambe den e Tim di Reino Hulandes nos ta haña hopi yu di Kòrsou. Pa nos esaki ta un chèns di mustra nos isla na fanátikonan di beisbòl rònt mundu.” Berry van Driel, Gerente Komersial di KNBSB, tambe ta kontentu ku e kolaborashon. “E kolaborashon entre e Tim di Reino Hulandes i Kòrsou ta mas ku kla. Na promé lugá dor di e kontribushon importante di hungadónan di Kòrsou den nos Tim di Reino i e kooperashon ku Curaçao Baseball Foundation. Banda di esei, komo Federashon nos ta sostené beisbòl i sòftbòl tambe riba tereno di entre otro materialnan, entrenamentu i personal.”
