37 persona a terminá e kursonan ku éksito
WILLEMSTAD – 22 di desèmber 2022 – Durante di e periodo tras di lomba a tuma lugá 2 kurso mas komo parti di e programa di training Her & Bijscholingstraject Hospitality Sector .
Ta trata aki di e kurso di Resepshonista i e kurso di Guia Turístiko. Durante un seremonia ameno, un total di 37 persona a risibí nan sertifikado despues di a terminá ku éksito un di e kursonan ariba menshoná. E seremonia di entrega di sertifikado a tuma lugá den presensia di Minister di Desaroyo Ekonómiko, sr. Ruisandro Cijntje.
E kurso di Resepshonista tabatin un durashon di 3 siman i a keda ofresé pa Teamwork Curaçao. E kurso a konsistí di 6 modulo: Servisio na kliente, Komunikashon efektivo, Etikèt di komunikashon na telefòn, Kon pa atendé ku keho i lès di idioma ingles i tambe hulandes. Un total di 24 persona a terminá e kurso ku éksito.
Pa loke ta trata e kurso di Guia Turístiko, 13 persona a terminá e kurso ku éksito. E kurso a keda ofresé pa e kompania One Caribbean i a keda kordiná pa sr. Emlyn Pietersz kual ta un trainer sertifiká. E kurso a konsistí di e siguiente modulonan: Komunikashon efektivo, Guia durante kaminata, Guia riba un vehíkulo movibel i Guia pa tur. Tambe e kursistanan a kompletá e Personal Empowerment & Service Orientation training ku éksito. Meta di e training aki ta pa krea profeshonalnan motivá pa por ofresé nan klientenan un servisio di kalidat haltu. E training tabatin un durashon di 2 seshon di mitar dia i a keda ofresé pa Experientia.
E programa di training, Her & Bijscholingstraject Hospitality Sector ta resortá bou di MEO miéntras CTB ta enkargá ku ehekushon di e programa. E programa ta keda ehekutá den estrecho kolaborashon ku SOAW i partnernan den sektor privá.
CTB, MEO i SOAW ta deseá e kursistanan tur klase di éksito pa futuro.
