Home / Press Releases / Seremonia di “Groundbreaking” di Curaçao Hospitality and Tourism Training Centre

Willemstad – 27 di òktober 2022 – Dia 27 di òktober a tuma lugá e seremonia festivo pa duna inisio di e trabounan relashoná ku e hotèl di siña/‘hospitality experience centre’ na John F. Kennedy Boulevard (anteriormente Hector Suites Hotel). Den e hotèl di siña, studiantenan den e sektor di hospitalidat i turismo ta ser prepará pa bira profeshonal.

Na e seremonia Minister di Enseñansa, sr. Sithree van Heydoorn i Minister di Desaroyo  Ekonómiko, sr. Ruisandro Cijntje, tambe tabata presente. Nan a enfatisá e importansia di e ‘hospitality experience centre’ pa Kòrsou i e region di Karibe.

E hotèl di siña (leerhotel) ta bini di e fundashon Curaçao Hospitality and Tourism Training Centre (CHTTC). E fundashon CHTTC ta un kolaborashon entre Ofisina di Turismo di Kòrsou (CTB), Curaçao Hospitality & Tourism Association (CHATA) i ROC Mondriaan na Den Haag. Alabes tin estrecho kolaborashon ku e institushonnan edukashonal Maris Stella SBO, Nilda Pinto SBO i Universidat di Kòrsou Dr. Moises Da Costa Gomez (UoC), i tambe ku gobièrnu, sektor empresarial i otro partnernan.  

E hotèl di siña no tin nòmber ainda. Pa medio di un kompetensia ku lo ser lansá, lo skohe un nòmber pa e hotèl akí. 

E meta ta pa despues di un renovashon ekstenso, e hotèl di siña lo ta kla pa ser usá dor di studiantenan i huéspetnan den e promé kuartal di 2023.

Groundbreakingceremonie Curaçao Hospitality and Tourism Training Centre
Groundbreaking ceremony Curaçao Hospitality and Tourism Training Centre