Home / Press Releases / ROC Mondriaan, CHATA i CTB ta firma MOU

pa establesé un Hospitality Experience Center pa Kòrsou

WILLEMSTAD- 4 di ougùstùs, 2022 – Resientemente ROC Mondriaan, un prominente institushon edukashonal riba tereno di hospitalidat i turismo, Ofisina di Turismo di Kòrsou (CTB) i Curaçao Hospitality & Tourism Association (CHATA) a topa pa firma un memorandum of understanding (MoU) entre e tres partidonan. Sr. Hans Schutte, Presidente di e Huntu di Direktiva di ROC Mondriaan, Managing Director di CHATA, sra. Maria-Helena Seferina-Rojas i Counterpart Statutair Directeur di CTB, sr. Muryad de Bruin, a bini huntu na ofisina di ROC Mondriaan na Den Haag pa e momentu importante akí. E MoU akí ta deliniá un kooperashon sostenibel entre e partidonan den forma di un ‘hospitality experience center’. E hospitality experience center, ku ta un fundashon registrá na Kámara di Komèrsio di Kòrsou komo ‘Curaçao Hospitality and Tourism Training Centre’ (CHTTC), ta enserá un instituto di entrenamentu pa studiantenan i profeshonalnan den e industria di hospitalidat i turismo. Un hospitality experience center, ku ta hasi uso di e eksperensia di tur partido, lo mehorá e aliniashon entre enseñansa di hospitalidat i turismo i e sektor, i na mes momentu mehorá e nivel di servisio ku ta ser duná na turistanan.  

CHTTC ta fasilitá estudionan na nivel di SBO riba tereno di hospitalidat i turismo. E parti práktiko di e estudionan lo tuma lugá den e experience center (un training hotèl aki na Kòrsou). CHTTC lo traha den laso estrecho ku vários institushon edukashonal, inkluso Maris Stella SBO, Nilda Pinto SBO i Universidat di Kòrsou Dr. Moises Da Costa Gomez (UoC), i tambe gobièrnu, komunidat empresarial (inkluso hotèlnan) i otro partnernan.

Den e lunanan benidero, e training hotèl lokal lo haña un renovashon kompleto pa por kuminsá risibí huéspetnan. Profeshonalnan huntu ku dosentenan lokal di e SBO-nan i UoC lo duna siñansa enfokando riba guia práktiko, kombiná ku lèsnan di teoria. E estudionan i entrenamentu lo yuda forma i prepará hóbennan i adultonan na Kòrsou i den region i brinda nan e perspektiva di un karera den sektor di hospitalidat i turismo. Alabes e sektor di turismo lo benefisiá di profeshonalnan altamente kualifiká riba tereno di hospitalidat i turismo.

Danki spesial ta bai na e Gabinete di Minister Plenipotensiario di Kòrsou pa nan embolbimentu for di komienso di e kòmbersashonnan, e Ministerio di Enseñansa (OWCS) pa nan sosten kontinuo pa sigurá un bon konekshon entre enseñansa i e merkado laboral, i na e Ministerio di Desaroyo Ekonómiko (MEO) pa fasilitá e establesimentu di e fundashon atraves di CTB.

ROC Mondriaan, CHATA en CTB ondertekenen MOU
ROC Mondriaan, CHATA and CTB sign MOU