Home / Press Releases / CTB huntu ku partnernan den sektor di turismo a bishitá Sürnam i Trinidad

pa promové nos pais

WILLEMSTAD- 17 di yüni 2022 – Resientemente representantenan di Ofisina di Turismo di Kòrsou (CTB) huntu ku diferente partner lokal a bishitá Sürnam i Trinidad. Meta di e bishita aki tabata  pa informá i konsientisá e sektor di turismo na ámbos pais tokante loke Kòrsou tin di ofresé komo destinashon turístiko.

Sürnam

Na e biahe pa Sürnam, CTB a keda kompañá pa dos hotèl di Kòrsou i un representante di e sektor di turismo médiko i wellness. Durante e bishita, e tim di Kòrsou a tene un ‘Mini Curaçao InfoMart’ huntu ku diferente aerolínea i agensia di biahe di Sürnam pa asina duna informashon di e produkto turístiko ku Kòrsou ta ofresé. Tambe e tim a duna diferente presentashon na agensianan di biahe, medionan di komunikashon, ‘influencers’ i operadornan di tour. Esaki ku e meta pa e partnernan akí ta mas ekipá pa brinda mihó informashon i servisio na nan klientenan ku ke bishitá Kòrsou. Ademas CTB a tene vários reunion ku diferente aerolínea i otro partnernan komersial na Sürnam i a duna entrevista na korant i na radio.

Trinidad

E bishita na Trinidad a konsistí di un delegashon di sinku hotèl i resort di Kòrsou, un operador di tour, representante di sektor di turismo médiko i wellness i representantenan di CTB. Akinan e tim di Kòrsou a organisá un ‘Marketplace’ spesialmente pa e representantenan di e mihó agensianan di biahe na Trinidad bin risibí mas informashon di loke Kòrsou tin di ofresé.

Alabes a tene un presentashon pa miembronan di prensa, ‘influencers’ i organisashonnan di biahe tokante tur e desaroyonan nobo na nos isla. Despues di e presentashon tabatin un demonstrashon di kòktel di konosido bartènder lokal, Brenton Balentien, siguí pa un presentashon di kantante Tony Shearman pa klousurá e evento.

Finalmente, huntu ku diferente aerolínea i agensia di biahe na Trinidad, a organisá dos enkuentro na kual e públiko general a keda invitá pa risibí informashon di Kòrsou, p’asina nan por plania nan próksimo vakashon.

CTB ta gradisí tur e partnernan di sektor privá ku a forma parti di e tim di Kòrsou na e diferente eventonan.

CTB participated in various activities in Germany to promote Curaçao
CTB together with its tourism partners visited Surinam and Trinidad to promote our island