Home / Press Releases / AFC Ajax ta bishitá Kòrsou

partido amistoso kontra Tim Kòrsou riba 20 di mei próksimo

WILLEMSTAD- 5 di mei 2022 – Durante di un konferensia di prensa, Ofisina di Turismo di Kòrsou (CTB) huntu ku FFK, Jong Holland, Kontentu Media Center i Call To Action Management (CTAM) a duna informashon referente e programa durante di e bishita di AFC Ajax na Kòrsou. Despues di un temporada nashonal i internashonal eksitoso e selekshon di AFC Ajax lo ta na Kòrsou di 17 pa 21 di mei 2022. E programa lo konkluí ku un partido amistoso. Delaster biaha ku e selekshon tabata na Kòrsou ta na 2010, pues ta un bon momentu sigur pa konosé otro di nobo. Kòrsou for di 2020 ta partner ofisial di Ajax i ta prominentemente visibel ku e logo ‘Curaçao’ riba manga di e shùrt di e ekipo. Tambe durante partidonan Kòrsou ta visibel tur kaminda den e stadion i na televishon (inter)nashonal.

Durante di e bishita e kolaborashon eksitoso riba tereno deportivo entre Kòrsou i AFC Ajax lo haña tambe un karakter sosial ku entre otro klínika di futbòl pa hóben ku e meta pa sigui stimulá desaroyo di talento serka nos hóbennan. Ademas e programa lo inkluí; seminario pa coachnan i staf, un evento di training di e ekipo di Ajax i bishita na entre otro Johan Cruijff Court i e fasilidatnan di Jong Holland.

E bishita lo konkluí ku un partido amistoso entre AFC Ajax i Tim Kòrsou riba djabièrnè 20 di mei pa 8or di anochi na stadion Ergilio Hato (SDK). Tim Kòrsou ta formá pa futbolistanan profeshonal na Europa ku roots na Kòrsou huntu ku hungadónan di e ekipo kampion di Kòrsou esta Jong Holland. CTB huntu ku demas partnernan ta invitá pueblo di Kòrsou kompletu pa tei presente pa mira e gran partido amistoso entre AFC Ajax i Tim Kòrsou. Por kumpra karchi entrante djaweps 5 di mei 2022 na diferente punto di benta i tambe online. Pa mas informashon bishitá: ajax.curacao.com.

The CTB and local partners promoting Curaçao in the Netherlands and Belgium
AFC Ajax bezoekt Curaçao