Kòrsou a risibí riba 35 mil turista di estadia na yanüari 2022

February 16, 2022

WILLEMSTAD- 16 di febrüari 2022Ofisina di Turismo di Kòrsou (CTB) ta raportá un kantidat di 35.489 turista di estadia pa luna di yanüari. Di e 35.489 turistanan risibí, un total di 74% a bini for di Europa, 12% a bini for di Nort Amérika, 10% for di Sur Amérika, 2% for di Karibe i tambe 2% for di sobrá paisnan di mundu. Pa dia, un kantidat di 1.145 turista di estadia a keda registrá. Huntu e turistanan risibí na luna di yanüari a keda un total di 413.164 anochi riba Kòrsou.

For di Hulanda nos a risibí 23.631 turista, kual ta 29% mas ku na luna di yanüari 2019 esta promé ku pandemia. For di Alemania, 794 bishitante a keda risibí miéntras for di Bèlgika 519 bishitante a keda risibí. Di e turistanan europeo aki, 56% a keda den un ‘resort hotel’ (esta hotèl grandi, chikí i bùngalo) na luna di yanüari.

For di Estádos Unídos un kantidat di 3.459 turista a keda risibí na luna di yanüari. Pa loke ta trata Canada, e total di turista risibí tabata 772. Esaki ta nifiká ku nos a risibí un total di 4.231 turista for di Nort Amérika. Di e turistanan prosedente di Nort Amérika 61% a keda den un ‘resort hotel’.

For di region di Sur Amérika un total di 3.516 turista a keda risibí. Di e turistanan aki un total di 1.928 esta 55% ta prosedente di Colombia. Miéntras 605 esta 17% a bishitá nos for di Brazil. For di region Karibe, Kòrsou a risibí 867 turista di estadia na yanüari, primordialmente for di e paisnan di Karibe Hulandes.

Na luna di yanüari un total di 39 barku krusero a bishitá nos pais ku un total di 39.975 turista krusero.

E kantidat di turista di estadia registrá na komienso di aña a kontinuá den bon direkshon. E progreso registrá den e delaster lunanan di 2021 i kuminsamentu di e aña aki ta danki na e esfuerso kolektivo di stakeholders lokal huntu ku nos partnernan internashonal den nos merkadonan prinsipal. E esfuerso kolektivo kombiná ku e prestashon aktual, ta duna señal positivo pa ku e meta stipulá pa 2022 esta pa alkansá un total di 375 mil turista di estadia.

Most recent