Home / Press Releases / Konstrukshon Área di Rekreashon Marie Pampoen fase 3 a inisiá

A desvelá bòrchi di trabou
WILLEMSTAD- 4 di febrüari 2022 – Resientemente a desvelá e bòrchi ku ta marka inisio ofisial di konstrukshon di e terser fase di e área di rekreashon na Marie Pampoen. E trabounan ku ta bai keda realisá na e área ta forma parti di un plan maestro pa desaroyá un área di rekreo ku aktividatnan ekonómiko pa e habitantenan di Kòrsou en general i di Marie Pampoen i bisindario en partikular. Na mes momentu e área ta fungi komo un produkto turístiko kaminda e turista por topa ku e hende lokal i eksperensiá nos isla. Komo parti di fase 1 i 2 di e proyekto a konstruí diferente fasilidat na e área di rekreo na Marie Pampoen kualnan ta sumamente bon usá pa diferente grupo den nos komunidat i tambe bishitantenan. Desvelo di e bòrchi den kuadro di fase 3 a keda hasí pa Minister di Desaroyo Ekonómiko, Ruisandro Cijntje, Minister di Tráfiko, Transporte i Planifikashon Urbano, Charles Cooper, Minister enkargá ku Salubridat, Medio Ambiente i Naturalesa, Dorothy Pietersz – Janga i direktor athunto di Ofisina di Turismo di Kòrsou (CTB) Hugo Clarinda.

Komo parti di e terser fase di e proyekto lo enfoká riba lo siguiente: diferente fasilidat pa rekreo i deporte manera entre otro un playa ku diferente palapa, diferente posibilidat pa mucha i hóbennan por hunga i dibertí, un área pa fitness den airu liber, un pir, posibilidat pa hasi beach volleyball, 3 kiosko, diferente banki, áreanan pa piknik, edifisio pa tualèt, landscaping, iluminashon, protekshon di kosta i tambe e infrastruktura nesesario pa awa i koriente.

E proyekto ta finansiá for di fondonan ku a keda fasilitá pa Ministerio pa Desaroyo Ekonómiko (MEO). Heren2 Caribbean ta supervisá e konstrukshon miéntras kordinashon di e proyekto ta den man di CTB. E grupo di trabou ta konsistí di representantenan di e ministerionan di MEO, VVRP i GMN huntu ku CTB. E trabounan di konstrukshon ta den man di Curacaose Wegenbouw Maatschappij B.V. (CWM).

CTB ta konta ku komprenshon i pasenshi di tur usuario i spesialmente habitantenan di Marie Pampoen pa kualke molèster ku e trabounan por trese kuné.  

Construction to start on final phase of the Zakito Quick Win Plan
Official start Marie Pampoen Recreational Area phase 3