WILLEMSTAD- 3 di desèmber 2021 – Resientemente Ofisina di Turismo di Kòrsou (CTB) huntu ku KLM a organisá un bishita edukashonal pa agentenan di biahe for di Hulanda. Manera tur aña ta e kaso rondó di e Curaçao KLM Marathon ta invitá un grupo di agente di biahe pa partisipá na e kaminata i tambe pa bin eksperensiá e produkto ku Kòrsou ta ofresé di manera ku nan por bende esaki na nan klientenan. E bishita di 6 dia a konta ku partisipashon di 19 agente di biahe hulandes.
Banda di partisipashon na e Curaçao KLM Marathon e programa pa e agentenan di biahe a inkluí entre otro; ‘site-inspection’ na diferente akomodashon grandi i chikí, rekorido riba skuternan eléktriko den e distritonan Otrobanda, Punda, Pietermaai i Scharloo pa konosé entre otro e aspekto históriko di nos sentro di siudat Willemstad, nos brùg flotante i wak e diferente muralnan kolorido den e áreanan aki. Tambe e agentenan di biahe a bai kome na diferente restorant lokal pa purba nos kushina krioyo i platonan internashonal, siguí pa un presentashon di parti di KLM, trep riba boto pa konosé e área Ost di Kòrsou, tour den bus pa konosé e área di Bandabou inkluyendo bishita na diferente playa i tambe rekorido na Kas di Pal’i Maishi.
Un danki ta bai na Corendon Mangrove Beach Resort ku a proveé e hospedahe pa e agentenan di biahe. CTB ta sigui invertí den e tipo di programanan aki ku e meta pa oumentá e kantidat di turista di estadia pa Kòrsou.
