Resientemente e operador di tour Here You Travel di Miami huntu ku Ofisina di Turismo di Kòrsou (CTB) a organisá un bishita di trabou pa 35 agente di biahe for di Miami bishitá Kòrsou. Meta di e bishita di trabou tabata pa e agentenan di biahe sera konosí ku Kòrsou i topa ku representantenan di akomodashonnan lokal i provedornan di servisio den sektor turístiko. E programa pa e agentenan di biahe a inkluí ‘site inspection’ na diferente akomodashon lokal, rekorido den nos sentro di siudat, Scharloo, Pietermaai i bishita na atrakshonnan turístiko.
Na final e agentenan di biahe a ekspresá di ta kontentu di por a bishitá Kòrsou pa asina eksperensiá e produkto turístiko úniko ku nos pais ta ofresé. CTB ta sigui invertí den e tipo di interkambionan aki ku e meta pa oumentá e kantidat di turista di estadia pa Kòrsou.
