ku un aviso personalisá i rifa di un biahe pa Kòrsou bou di fanátikonan
WILLEMSTAD- 7 di mei 2021 – Djadumingu último 2 di mei, Ajax a logra su di 35 título di kampion di Nederlandse Eredivisie. Mirando e partnership entre Kòrsou i Ajax, Ofisina di Turismo di Kòrsou (CTB) a felisitá e ekipo di Ajax i tur e fanátikonan hasiendo uso di un aviso personalisá ku e teksto: “Ajax Pabien”. E aviso di felisitashon a keda kompartí riba diferente plataforma di medionan sosial i tambe riba bòrchinan digital den sentro di Amsterdam. E aviso ta inkluí tambe e wèpsait di Kòrsou pa tur ku mira e aviso por bishitá e wèpsait pa sa mas di e produkto turístiko ku Kòrsou ta ofresé. Ademas huntu ku Ajax Life, e klup di fanátikonan di Ajax, ta rifa bou di e 88 mil fanátikonan un biahe pa Kòrsou pa 2 persona.
Manera ta konosí for di prinsipio di aña pasá, e logo di Kòrsou ta prominentemente visibel riba manga di e shùrt di Ajax. Ademas pa medio di e promoshonnan ku ta keda hasí rondó di e partidónan, tantu via televishon komo diferente otro kanalnan di Ajax, ta hasi posibel pa komo Kòrsou nos alkansá miónes di fanátiko di e klup na Hulanda i tambe rònt mundu.
