Home / Press Releases / Turismo di Estadia desèmber 2020
Statistics 2020

WILLEMSTAD- 20 di yanüari 2021Ofisina di Turismo di Kòrsou (CTB) ta raportá un kantidat di 9.909 turista di estadia pa luna di desèmber. E kantidat aki sigur tabata un desapunto. Pa motibu di Covid-19, Kòrsou a introdusí restrikshon di biaha pa Kòrsou na mart 2020. Gradualmente a kuminsá trese kambio den e restrikshonnan pa ku entrada na Kòrsou medio luna di yüni pa e islanan di Karibe Hulandes i seguidamente pa Europa riba promé di yüli 2020. Durante e di 3 kuartal di aña 2020 (yüli, ougùstùs, sèptèmber) Kòrsou a risibí 8.195, 9.227 i 10.420 turista di estadia respektivamente. Durante e di 4 kuartal (òktober, novèmber, desèmber) Kòrsou a risibí 13.556, 13.705 i 9.909 turista di estadia respektivamente. E motibu di e kaida den kantidat di turista di estadia na luna di desèmber ta relashoná direktamente ku e konseho di biahe negativo anunsiá pa Gobièrnu Hulandes na komienso di desèmber, na momentu ku a pone Kòrsou riba kódigo oraño. E desaroyo aki tin su impakto negativo tambe riba e kantidat di turistanan for di Hulanda pa e próksimo temporada.

Na luna di desèmber, Kòrsou a risibí 7.092 turista for di Hulanda kual ta 61% ménos ku e kantidat risibí na desèmber 2019. For di Alemania un kantidat di 306 turista a keda registrá. Na desèmber, 35% di turistanan prosedente for di Europa a keda den un ‘resort hotel’ (esta hotèl chikí, grandi i bùngalo). Durante e lunanan anterior e kantidat ku tabata keda den un ‘resort hotel’ tabata 55%; esaki tambe ta un di e otro efektonan di e konseho di biahe negativo. Di otro banda, e kantidat averahe di estadia di turistanan na luna di desèmber sí tabata muchu mas haltu. Turistanan prosedente for di Europa a keda kasi 4 anochi adishonal na desèmber 2020 kompará ku desèmber 2019. Na desèmber 2020 e averahe di anochi tabata 13.6, miéntras na desèmber 2019 un averahe di 10.0 anochi a keda registrá.

E echo ku Kòrsou tabata risibí for di Estádos Unídos turista solamente for di 4 estado kombiná ku un kantidat limitá di aerolínea a pone ku Kòrsou a risibí na luna di desèmber 960 turista for di USA. Un kantidat di 10% di e total di turista risibí na luna di desèmber ta prosedente di USA. Un total di 137 turista a bishitá nos for di Canada. For di region Karibe, Kòrsou a risibí 424 turista di estadia na desèmber, primordialmente for di e islanan den Reino Hulandes.

Sifranan yanüari te ku desèmber 2020

Kòrsou a registrá na 2020 un total di 174.871 turista di estadia. Esaki ta solamente 38% di e total risibí na 2019. Aña 2020 a kuminsá hopi fuerte; 62% di e kantidat total di turista di estadia ku a bishitá Kòrsou a keda risibí durante e promé 3 lunanan di aña. Mayoria di nos bishitantenan ta prosedente di Europa (64%), sigui pa Nort Amérika, 19% ta prosedente for di e region aki. Sur Amérika, Karibe i sobra di mundu a registrá 8%, 6% i 3% respektivamente.

CEO di CTB, Paul Pennicook a remarká, “mirando e echo ku Kòrsou a keda poné riba kódigo oraño dor di Hulanda, nos ta antisipá un reto pa loke ta trata e kantidat di bishitante mensual for di Hulanda den e promé kuartal di 2021. Nos ta keda karga speransa ku e konseho di biahe lo keda adaptá pronto di manera ku nos lo por kuminsá risibí turistanan hulandes bèk. Mientrastantu CTB ta sigui promové Kòrsou den e merkadonan di enfoke awor ku e restrikshonnan pa ku entrada na Kòrsou a keda eliminá pa sobrá di mundu. E ophetivo pa sobrá di e aña aki ta pa stimulá demanda for di tur merkado”.

Statistics 2020
Memorandum of Understanding signed between the CTB and the UoC
December stayover visitors’ performance