Home / Press Releases / Curaçao Virtual Tourism Fair ta debutá na Europa

WILLEMSTAD- 26 di ougùstùs 2020 – Resientemente, Ofisina di Turismo di Kòrsou (CTB) a organisá e promé ‘Curaçao Virtual Tourism Fair’, dirigí riba merkado europeo. E pandemia mundial a forsa diferente industria i organisashon pa usa teknologia di manera ku nan por sigui operá. Esei ta konta tambe pa CTB i sektor di hospitalidat riba nos isla. Den industria di turismo, promoshon via medionan virtual a bira indispensabel pa bo por keda kompetitivo. E promé edishon di Curaçao Virtual Tourism Fair a bira e vershon digital i interaktivo di e eventonan manera Vakantiebeurs di Hulanda i ITB di Alemania.

Ora Kòrsou a habri frontera bèk dia 1 di yüli último, e promé merkadonan ku a bira aksesibel atrobe ta algun pais di Wèst Europa manera Hulanda i Alemania. P’esei mes, e promé agentenan di biahe i operadornan di tour ku a keda invitá pa e feria virtual ta esnan di Hulanda, Bélgika i Alemania.

Na e evento, CTB a duna un presentashon ku informashon aktualisá di Kòrsou su produkto turístiko i e protokòlnan ku tin establesé, i e partisipantenan por a papia ‘live’ ku partner hotelero, operador di buseo i partner ku ta ofresé otro tipo di atrakshon turístiko. Na lugá di e tradishonal ‘booth’ físiko, e partisipantenan por a wak i hasi presentashon, rekonektá, interaktuá i sera akuerdo promoshonal via medio virtual. CEO di CTB, Sr. Paul Pennicook a indiká ku “CTB ta sigui ku su esfuersonan pa promové nos pais den eksterior, usando medionan nobo i kreativo pa logra esei.  Agregando ku e mas di shen operadornan di tour i agentenan di biahe, i e 58 suministradónan ku a partisipá na e promé Curaçao Virtual Tourism Fair, ku konfiansa por bisa ku e tabata un éksito rotundo”sr. Pennicook a agregá.

No muchu leu den futuro, CTB tin intenshon di hiba Curaçao Virtual Tourism Fair na algun otro merkado tambe, manera Norte- i Suramérika. CTB ta gradisí CHATA i e 45 partnernan di sektor privá pa a forma parti di e promé Curaçao Virtual Tourism Fair.

Over 8,000 stayover visitors in July
Curaçao Virtual Tourism Fair Makes Its Debut In Europe