Home / Press Releases / Gobièrnu ta hasi traspaso di maneho di Kompleho Deportivo Marie Pampoen

WILLEMSTAD- 1 di yüli 2020 –  Resientemente Ofisina di Turismo di Kòrsou (CTB) ku ta enkargá ku desaroyo di e área di rekreo na Marie Pampoen a organisá un enkuentro kaminda Gobièrnu di Kòrsou a hasi traspaso ofisial di maneho di e kompleho deportivo bèk na Fundashon pa Progreso Marie Pampoen. Na 2015 Gobièrnu a enkargá CTB ku desaroyo di e área di rekreo na Marie Pampoen. E proyekto aki ta un inisiativa di Ministerio di Desaroyo Ekonómiko huntu ku Ministerio di Tráfiko, Transporte i Planifikashon Urbano i Ministerio di Salubridat Públiko, Medio Ambiente i Naturalesa. E promé fase kual a enserá konstrukshon di e aria parti Wèst a keda konkluí na 2017. Konstrukshon di e kompleho deportivo esta fase 2 di e proyekto a start na 2018 i a keda konkluí awor.

Durante di e enkuentro, Minister di Tráfiko, Transporte i Planifikashon Urbano sra. Zita Jesus-Leito a firma un akuerdo di maneho ku e fundashon. Minister di Desaroyo Ekonómiko dr. Steven Martina kompañá pa Minister di Tráfiko, Transporte i Planifikashon Urbano sra. Zita Jesus-Leito, Minister di Salubridat Públiko, Medio Ambiente i Naturalesa sra. Suzy Camelia-Römer, Minister di Desaroyo Sosial, Labor i Bienestar sr. Hensley Koeiman i sra. Lizette Sambo-Velder den representashon di Ministerio di Enseñansa, Kultura, Siensia i Deporte (OCWS) a hasi entrega di e yabinan di e kompleho deportivona sr. Andy Janga i sr. Silvin Maduro di e fundashon. Fundashon pa Progreso Marie Pampoen a risibí un kompleho deportivo nobo i moderno ku ta inkluí un edifisio ku espasio pa un ofisina, snèk, terasa, kamerín i tualèt. Tambe tin un vèlt multi funshonal pa basketbòl, vòlibòl, mini futbòl, dos vèlt pa bolas criollas i un vèlt pa futbòl ku yerba artifisial. CTB i demas partnernan den e proyekto ta gradisí tur usuario di e aria i spesialmente habitantenan di Marie Pampoen pa e koperashon risibí durante di e trayekto di konstrukshon. Ta konta ku e koperashon kontinuo di tur bishitante ku ta hasi uso di e área pa kuid’é i manten’é komo un lugá agradabel pa nos mes hendenan i turistanan por rekreá.

The Curaçao Tourist Board (CTB) Organizes Information Sessions for the Hospitality Industry
Government Transfers Management of Marie Pampoen Sports Complex