WILLEMSTAD – 5 di desèmber 2019 – Awe 5 di desèmber e aerolínea Avianca ta selebrá 100 aña di eksistensia. Ofisina di Turismo di Kòrsou (CTB) i Curaçao Airport Partners (CAP) ta felisitá e kompania ku e logro memorabel aki. E aerolínea kolombiano ta e di dos kompania di aviashon ku mas aña di eksistensia den un historia impreshonante datá for di siglo 20. La Sociedad Colombo Alemana de Transporte Aéreo (Scadta) a keda fundá na 1919 na Barranquilla, Colombia. Mesora e aerolínea a revolushoná transporte aéreo entre siudatnan kolombiano, ya ku anteriormente tur biahe tabata sosodé via barku i tabata dura simannan largu, pero desde e momentu ei a redusí e tempu di biahe na únikamente algun ora. Despues a inougurá buelonan internashonal ku komo destinashon Venezuela i Estádos Unídos.
Na 1940 a hasi un kambio di marka i a ofisialisá Aerovías Nacionales de Colombia S. A. (Avianca). Algun aña despues na 1946 a establesé buelonan pa Quito, Lima, Panamá, Miami, New York i algun siudat na Europa ku avionnan DC-4 i DC-5. Avianca a sigui krese den un kompania di aviashonku presensia den merkadonan importante den Latinoamérika.
Avianca na Kòrsou: 39 aña sin interupshon
Avianca a kuminsá buelonan pa Kòrsou na sèptèmber di 1980 ku un Boeing 720B bou di e nòmber Aerocondor i te dia di awe e buelonan ta konsistente i sin interupshon. Kòrsou tabatin e honor di risibí diferente avion di Avianca entre nan e Boeing 757-200, Boeing 767-283, otro avionnan A318, A319, A320 i A330. Di akuerdo ku CEO di CTB, sr. Paul Pennicook “Kòrsou den transkurso di kasi 40 aña a establesé un laso estrecho ku Avianca. CTB ta orguyoso di por konsiderá Avianca un partner importante i ta felisitá e aerolínea ku nan 100 aña di eksistensia! CEO di CAP, sr. Ralph Blanchard a indiká ku “Avianca ta un sosio balioso i un aliansa importante entre Kòrsou i e merkadonan den kontinente latino. Nos ta spera ku Avianca por kontinuá ku e servisionan eksistente i tambe krea ekspanshon pa loke ta trata servisionan pa Kòrsou.”
CTB i CAP ta wak dilanti na kontinuashon di e buelonan diario di Avianca pa hopi aña mas i ta deseá e tim kompletu di Avianca, for di su akshonistanan, te na su maneho diario i su personal amabel hopi aña mas di buelonan eksitoso. Pabien!
