Home / Press Releases / Kòrsou su kampaña ‘Feel it for Yourself’ introdusí na Charlotte, North Carolina

WILLEMSTAD – 22 di yanüari 2019 – Despues di lansamentu di e kampaña nobo ‘Feel it for Yourself’ na New York i Miami, Ofisina di Turismo di Kòrsou (CTB) ta sigui amplia presensia di Kòrsou den merkado di Charlotte, North Carolina sosteniendo di e manera ei tambe e buelonan semanal nònstòp ku American Airlines. Ta promoviendo Kòrsou komo é destinashon den Karibe pa bishitá e temporada di wenter aki. Di e manera aki ta lanta kuriosidat serka e konsumidó for di Charlotte pa bin konosé nos dushi isla. E kampaña lo ta aktivo te ku fin di febrüari 2019.

Komo parti di e esfuersonan na Charlotte, CTB a drenta un kolaborashon ku Carolina Panthers, un ekipo profeshonal di futbòl amerikano na Charlotte, North Carolina. E ekipo ta forma parti di e National Football League, komo miembro di e divishon sur di NFC. Mester bisa ku Carolina Panthers ta un íkono den e komunidat di Charlotte i ta pèrkurá pa un eksperensia úniko na unda union i patriotismo ta brota bou di e habitantenan. E kolaborashon ku Carolina Panthers, ta duna Kòrsou e oportunidat pa promové e kampaña di branding nobo bou di e komunidat di Charlotte. Un total di 76% di personanan riba 21 aña na Charlotte ta fanátiko di Panthers.

E kolaborashon ta inkluí promoshon na radio promé ku wega, spòt durante di weganan regular di e temporada kualnan ta keda transmití riba e radio emisora di Panthers riba WBT 1110AM, post riba retnan sosial di e ekipo i post di e hungadó di Carolina Panthers, Curtis Samuel. Tambe CTB a organisá un evento na ‘Panthers on Mint’- un área pafó di e stadion kaminda fanátikonan ta den kontakto ku bendedonan di produkto i servisio. Akinan, CTB a promové e rifa di un biahe pa Kòrsou den kolaborashon ku Santa Barbara Beach Resort Curaçao i American Airlines. E wega, e dia ei, a konta ku un públiko inmenso di 74.188 fanátiko.

Ademas, di e kolaborashon ku Carolina Panthers tambe a aktivá un kampaña publisitario kaminda ta eksponé 20 aviso gigante den tránsito, esaki lo inkluí LYNX Blue Line Light Rail na Charlotte. Tin mas o ménos 16.400 pasahero ta trafiká tur dia riba e ruta aki. Adishonalmente tin publisidat pa Kòrsou riba e pantayanan ubiká na e plataformanan ku e konsumidó ta usa pa trafiká diariamente entre kas i trabou.

Curaçao’s unique tourism product presented to Travel Agents
Kòrsou a promové ‘Feel it for Yourself’ durante Vakantiebeurs 2019