Kòrsou su produkto turístiko úniko presentá na agentenan di biahe

January 11, 2019

durante di DER Touristik Campus LIVE Caribbean Islands 2018…
WILLEMSTAD- 11 di yanüari 2019 – Resientemente Ofisina di Turismo di Kòrsou (CTB) a partisipá na DER Touristik Campus LIVE Caribbean Islands 2018 ku a tuma lugá na Hilton Barbados Resort. DER Touristik ta un di e organisashonnan mas grandi di biahe i turismo na Europa. Durante 10 dia e mihó agentenan di biahe a partisipá na un ‘campus’ den kual nan a risibí informashon i entrenamentu riba produktonan di DER Touristik i su partnernan. Total a konta ku partisipashon di 94 agente di biahe.

‘Campus LIVE Caribbean Islands’ a konsistí di diferente komponente, e 94 agentenan di biahe a keda repartí den grupo di 6 ku a bishitá diferente destinashon den Karibe inkluyendo Kòrsou. Durante e pre-tour di 5 dia nan a sera konosí ku e destinashon mas mihó. Despues di e pre-tour e agentenan di biahe a reuní na Barbados pa e seminario prinsipal kual tabatin un durashon di 3 dia. Aki e agentenan di biahe ku a bishitá Kòrsou a representá nos isla durante di e ‘Round Table Talk’ kaminda partnernan importante di Der Touristik a wòrdu invitá pa haña mas informashon di e diferente destinashonnan. Durante e ‘Round Table Talk’ a elaborá tambe riba entre otro e konekshon aéreo ku Condor. E agentenan di biahe a haña e oportunidat tambe pa presentá Kòrsou komo destinashon na e otro agentenan di biahe durante un Feria di Biahe ku ta forma parti di e totalidat di DER Touristik.

CTB ta wak bèk ku satisfakshon riba otro seshon di kapasitashon eksitoso.

Most recent