…Tim di Kòrsou durante enkuentro ku prensa na Aruba…
WILLEMSTAD- 14 di sèptèmber 2018 – Resientemente un delegashon di Ofisina di Turismo di Kòrsou (CTB) i partnernan den e industria turístiko a tene un enkuentro ku prensa di Aruba pa asina informá prensa i agensianan di biahe di tur loke Kòrsou tin di ofresé promé ku aña 2018 kaba i tambe un tiki di loke por spera den 2019.
Durante luna di mart último a organisá e marshe di informashon ‘Curaçao Explosion in Aruba’ (CEA) kaminda a informá di e eventonan ku te na e momentu ei tabata konfirmá. Despues di e éksito di CEA e tim di Kòrsou a bolbe bishitá Aruba pa asina duna un update i hasi un invitashon ofisial pa Aruba bin disfrutá ku nos na Kòrsou.
Durante e enkuentro a kompartí informashon di diferente evento ku lo tuma lugá pronto na Kòrsou. Representante di e siguiente eventonan tabata presente personalmente pa informá di nan evento: Punda Vibes, Curaçao Dive Festival, Curaçao Pride, Flavors of Curaçao, Strongman Champions League Curaçao, The Flying Dutch, Festival Internacional de Musica y Humor Latino, KLM Curaçao Marathon, Baseball Week i Konsierto di Ilan Chester i Oscar Harris. Tambe a konta ku partisipashon di e siguiente hotèlnan: Acoya Curaçao Resort Villas & Spa, Renaissance Curaçao Resort & Casino i City Suites Curaçao.
Komo sorpresa pa e miembronan di prensa sr. Gregory Elias di Fundashon Bon Intenshon ku ta enkargá ku Curaçao North Sea Jazz Festival (CNSJF) a hasi un ‘call-in’ via telefòn i asina interkambiá i gradisí prensa di Aruba pa e sosten i kobertura duná durante CNSJF 2018. CTB ta yama su partnernan danki pa nan partisipashon. E enkuentro tabata unu agradabel i ta parti di e esfuersonan kontinuo di CTB pa posishoná nos isla komo ‘The Stage of the Caribbean’. Pa detaye di tur e eventonan ku lo tuma lugá na Kòrsou bishitá e sekshon di evento riba e wèpsait di CTB: https://www.curacao.com/en/dont-miss/
